Ynnin ka sngi da pynman ya ka yalang yalap Election u kyrtong ka NPP na 6-Moodymmai Nongkhroh Constituency, u Jesse Suiam ha chnong Tyrshang heiwa u Symbood Montri Rangbah, u Sniawbhalang Dhar da wan yalap u ya oo.
U Sniawbhalang da ong u wa ki paidbah ka Constituency man ki kiwa stat bha neibhah nadooh u 2008 ym jooh rem ki MDC yong oo na ka thaaiñ deiwa e nongmuna wa ya u Laitsing Shylla wa da pdiang ya oo na ka Congress ar sien khlem rem wei manda poi da ka NPP da pynyieñ da u Jesse Suiam leh da jop biang wei ha kani ka kynti leh i jop ym dooh de.
Da ong u wa i chah klambeiñ ka sorkar waka Party toh neidaw wa kreh ko, wei ka sorkar ka wym chah klam toh kawa yoh thiah donhi neibhah u dieñ wa boon soh da em bait kiwa wan tynrooh oo yow yoh u baam ya u sooh wei kiwa tynrooh ya ka sorkar toh kiwa kwah yow e baam ka sorkar ya ki.
Kamtæ da ong u wa katwa dang chah tynrooh ka sorkar kattæ dang boon i em ko ya ki MLA wei ka NPP toh kawa da synchaar la 7 tylli ki snem ka wym jooh em i yachoh yaprat ka wym jooh ka yaknieh heh, i pynhaap pynoor sorkar. Ka NPP toh kawa pynlut yei bor du neibynta ki kaam ki paidbah.
Chooh chooh da ong u wa nachwa ha ka 5 snem jooh yoh Chief Minister hadooh soo ngut tangwa katni nadooh wa synchaar ka NPP da em du uwi uwa yahkhmat.
Heiyatoh wa ka VPP da ong u toh kawa tip donhi u klam katwa u kreh ym tip ko deiwa e nongmuna wa u Ardent uwa da maad ya waroh ki Party wei hadien kani ka Election ym tip de cheiwon u lai u.
Kamtæ da ong u wa lada jooh yahbakla u ya ki paidbah ha ki soo sien wa da man MLA u ymtoh u ngiat de ki yeiwa ong u tangwa lada yoo ki wym jooh ieh ki ya oo wow sñiawbha ki wow burom ya oo deiwa pynjop ya u Jesse Suiam.
Ha kani ka yalang da emlang leh u MP ka Rajya Sabha, u Dr. W.R. Kharluki wa kiwi de deiwa wan sakhilang ki paidbah wa boon wow pynyoo yei kyrchaan ya u Jesse Suiam.
Discussion about this post