U Vivek Syiem, Superintendent of Police ka East Khasi Hills District da pynche u hajrong i pynbaad wa khrong poisa ki pulit ha Mawkhanu wa Thangshalai.
Hawa yaklam wa kiwa thoh khubor ynne ka sngi hapoh kamra krehkaam u, u Vivek da ong u wa hadien wa yoo ya ki Video kiwa da mih leh ha ki rnysan khubor, neiliang yong oo pyn ynne i step da phah u ya u SP City cha kitu ki thaw yow pynman takit wei kamjooh leh wow tympra ya ki yung trep wa da chah pynbaad wa khrong poisa pyrchah aiñ ki pulit.
U Vivek da khana u wa kitu ki pulit kiwa em ha katai ka thaw toh kiwa da phah da ka thanat Diengpasoh yow e yada hadien wa kyrpaad ki synjuk kiwa yah Truck wa em boon kiwa tooh khamtam hei janmiet wei kini ki pulit da kynreh kari ki ha kani ka thaw nadooh u snem 2024.
Da ong u wa katkam wa yoo ha ki Video wa lai ki dkhot ka KSU, da yoo wa i rukom krehkaam ki pulit ymtoh iwa biang neibhah toh u em ki ha sarok deiwa rahlang wa ki tiar yow leh ya ka Checking.
Chooh chooh da ong u wa hadien ka takit daw chim yei rai wow Suspend wei da phah leh wow kyrriah ya u OC khnang wym tuklar u yei takit.
U SP da kyntu u leh ya kiwa yah Truck wym toh u e poisa ki cha kiwon kiwon khamtam ya ki pulit kiwa leh Checking wei lada em kiwon kiwon kiwa dawa poisa, toh u ujor deiwa Phone ha u Number 112 lane ha ki Number Phone wa ka chnat pulit da pynbna paidbah ko.
U Vivek Syiem da ong u wa neiliang ka chnat pulit la kammon kammon leh ym pdiang ko yei khrong poisa pyrchah aiñ wa i baam tangka.
Discussion about this post