Nadooh u bnai wow wan u sdang ka Direct Flight na Guwahati cha Dhaka

Shillong: I pynsuk ya i lai i wan toh i kyntien wa ye wow wanrah yei yajan hapyrdi ki thaaiñ mihsngi wa ka ri Bangladesh, wei yeini da ong u Bangladesh Assistant High Commissioner to India, u Shah Mohammad Tanvir Monsur deiwa pynksan u yei emkaam wow pynkhlan ya i lai i wan lyngba ki lieñsuiñ wa ki rel hawa e yei klam ha ka One- Day Workshop on Responsible Tourism kawa da pynman ynne ka sngi ha State Convention Centre, Pinewood Hotel, Shillong.

Ya kani ka Workshop da pynman da ka chnat Tourism, wa ka Outlook Responsible Tourism, wei da kyrchaan leh da ka North Eastern Council, wei da wan wai ya ka da u James K. Sangma uwa man kam u kongsan.

“Heiyatoh wa ki lieñsuiñ, nadooh u bnai wow wan ka Civil Aviation Ministry of India daw sdang ko ya ka Direct Flight na Guwahati cha Dhaka,” da ong u deiwa pynrap wa daw yarap ko leh ya ka kaam uiñke suwari.

Hajrong i lai i wan lyngba ki wah da ong u wa ka Bangladesh da yaleh ko wow pynjanai yeini i kaam.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u leh wa ka sorkar India da e yarap ko hadooh USD 7 Billion cha ka sorkar Bangladesh wow pynsuk yei lai i wan hapyrdi ka Bangladesh wa ka thaaiñ lyngba ka luti rel.

U Monsur da pynrap u leh wa manda pynsuk yei lai i wan daw pynsuk leh ya i khayi pateiñ heiwa ka thaaiñ mihsngi daw ye ko wow challan ya ki mar cha kiwi ki ri lyngba ki Sea-ports namo ki thaw sangeh ki jhad ha Bangladesh.

Da pynrap u leh deiwa ong wa ha ki ar snem wa da lai ka Shillong wa Guwahati da man ki ki thaw wow pynyajan ya ki ri wa em cha South Asia wa East Asia. Da ong u leh wa ka Bangladesh u yaleh ko katwa ye wow pynku ya ka kaam uiñke suwari, ka puræ puthi, ka kaam niam, wa kiwi kiwi.

“Nga da e O 150 tylli ki Visa man ka sngi wei yooluti O leh wa na u bnai wow wan daw e noh 400 tylli ki Visa neibhah dei wym biang ki lieñsuiñ wa lai na Bangladesh cha ka thaaiñ mihsngi ka India (wei ini u ku i manda sdang ka Direct flight na Dhaka cha Guwahati),” da ong u Monsur.

Da kular u leh wow e yarap poisa wow sdang ya ka Website wei wow booh noh ya ka Business Directory.

Ha iwi i liang u Monsur da yaroh u ya u James neibhah wa ka Meghalaya da man ko ka jylla wa chongsuk neibhah duna bha i mih i awri awra wei da man ko ka thaw wa em akor.

Hawa yaroh ya i miat ka Meghalaya da ong u wa ki bru ka jylla da man sakhiat ki kiwa embhah wow yoh kam ini i miat wa da roh da kiwa boon.