Hadien wa ood ki khynnah skur wa kiwa chong chnong ka thaaiñ War Jaiñtia cha ka Khasi Students Union-War Jaiñtia Circle, ynne ka sngi neiliang ka seiñ hei emlang u General Secretary, u Lurman Talang wa kiwi kam u General Secretary ka chnat West Jaiñtia Hills District Unit, u Leningrad Tariang wa kiwi kiwi da lai ki cha kani ka skur sorkar kawa tip kam ka Sohkha Government Higher Secondary School heiwa da chem wa ym em uwa sikai Chemistry nadooh u Wisu (March) uni u snem.
Manda takit bniah ka seiñ da chem ko wa i daw hi toh wa kiwa sikai emkaam ki u pyndep ki ya ka B.Ed wei uni uwa sikai ya kani ka Subject da lai u wow pyndep yei puræ katkam ki kyndon sorkar.
Ka seiñ da phylla won ko wa weileh ka sorkar ymye ko u thung da uwi uwa sikai wot hadien wa da dep khut wow thap kreh ya katai ka kaam kawa lait hanla man ko kawa chipor yow lait ki khynnah skur u chitom.
Ka seiñ da dap ko leh dei chrai hawa jia kamni ya ki khynnah wa thrang wow poi chakhmat ha ki liang waroh, khamtam kattu wa toh i por wow thoh ya ka Pre-Selection waka Selection wa i pynkhreh ya kiwi ki Exam.
Ka seiñ da kular ko wow booddien yeini wei lada ka sorkar ymye ko wow pyndep ya i kaamram yong ka daw leh ka seiñ yeiwa emkaam.
Chooh chooh da klam che deiwa kylli wa lada kini ki khynnah kani ka skur ym yoh ki yei hikai wa biang kammon ka sorkar u pyrkhat ko neibynta yong ki?
Heijooh i por da dawa na ka sorkar wow bahkhlieh deiwa thooh laad thooh luti khnang wa kitai ki khynnah u yoh ki ya i hikai wa tikna chwa wow pynkhreh ya ki Exam yong ki.
Discussion about this post