Ka North Liberty Higher Secondary School Jowai kawi na ki skur wa jooh poi bha chakhmat ha ki Exam ka MBOSE nadooh SSLC wa HSSLC, ha kani ka kynti leh lyngba ka Result SSLC 2025 wa da pynbna da ka MBOSE ynne ka sngi da yoh psiah ko ha ka kyrdan wa hakhlieh dooh yong ka jylla namo ka 1st Position yong ka thup Top-20, wa kynthup leh ki ar ngut uwi haka kyrdan 8th Position wa uwi won ha ka kyrdan 17th Position.
Najrong ka Avila Kathrene P Lyngdoh ka khon ka Markamni Lyngdoh wa u Paul Synnah kawa da yoh yei kyrdan 1st Position, ki ar ngut won toh u Rahnam Miki Dkhar hei kyrdan 8th Position u khon ka Theo Dkhar wa u Center House Sutnga neitæ u Hamelamsuk Hadem hei kyrdan 17th Position u khon ka Bhalang Hadem wa u Balabor Rani.
Hei yaklam wa u Rahnam hajrong kani ka kyrdan wa yoh u, ong u wa da hun u neibhah nawa sdang leh chaniah u ha u Blai wei da e kti lut u leh kat iwa ye u.
Heiyatoh ka luti wow lai u chakhmat leh chaniah u hei pynlai u Blai, wei ym pu ye u wow khana yei thrang wa em ha oo, neibhah O hi sñiawthooh u wa u bru ye u wow em ka thong i thrang i angnood tangwa u Blai hi wow yahluti. Kamtæ ngait skem u wow yoh hi yeiwa thrang wa angnood dei kreh chitom kamjooh i emlang u Blai chirup wa oo.
“Lada booh ya u Blai hakhmat ym em iwon iwon leh i wym ye u man næ jop,” ong u Rahnam.
U Hamelamsuk Hadem leh ong u lyngba i emlang u Blai chirup i kreh chitom yong oo nadooh wa sdang snem da yoh u ka Result wa pynkmen ya oo ynne ka sngi.
Heijooh i por leh ong u wa lyngba i yarap i kyrchaan ka bei u pa, kiwa sikai, kiwa ha-yung ha-sem, ki lok ki jor da yoh mynsien bha u wow lehbha hei puræ puthi.
Neiliang ki bei ki pa yong kini ki khynnah leh pynsñiaw ki yei kmen yei naam i burom wa da rah ki khon ki kti yong ki kamwa ki leh da thrang da angnood ki.
Discussion about this post