Ynne ka sngi u montri rangbah ka jylla, u Conrad Sangma da lai booddien u yei pynkhreh wow yakhun ya ka khlam COVID-19 ha North Garo Hills District hei emlang u Deputy Speaker ka jylla, u Timothy D. Shira, ki sahep ka chnat i chait i khiah wa kiwi kiwi.
Ka North Garo Hills da man ko leh ka District kawa duna dooh kiwa yoh ya u COVID-19 nadooh wa sdang hadien ka South West Khasi Hills heiwa katni ha North Garo Hills da em 139 ngut kiwa dang chah ktah.
U Conrad da lai pait u leh ya ka Resubelpara Community Health Centre (CHC), heiwa da pyntip u wa ka Oxygen Plant wa pynmih 150 litre chi minit da chna ya ka ha kani ka CHC ka wow ye u pyndap yei emkaam la’ær Oxygen ki 15 pyllong.
Da pyntip u wa hanla kiwa chah ktah ha u COVID-19 ha North Garo Hills dang duna bha ki, tangwa da pynkhreh lada jia iwon iwon heiwa da phah leh ya ki bor sorkar wow booh le tylli ki pyllong ICU heiyatoh wa ka khlam COVID-19.
Chooh chooh da pyntip u wa da phah ya ki bor sorkar wow pynboon ya ki pyllong cha ki 40 tylli ha Resubelpara CHC heiyatoh wa u COVID-19, da phah leh wow thooh ya i thaw wow booh ya ka thaw sumaar wow em 150 tylli ki pyllong wow yakhun ya kani ka khlam.
Da ong u wa hajrong ki 150 tylli ki tadong Oxygen neibynta ka North Garo Hills, ka Resubelpara CHC da em ko 84 tylli ki B Type Cylinder, 15 tylli ki D Type Cylinder wa 15 tylli ki Oxygen Concentrator.
Ha kani ka sngi da chong yalang leh wa ki bor sorkar ha ka District kiwa da kyntu ya oo wow pynboon ya ki wakreh kam ki Nurse wa kiwi kiwi wei wow booh Ambulance ha Manikanj PHC wa ha Damas PHC.
