Jowai: Ka dorbar lyiur yong ka Jaiñtia Hills Autonomous District Council wa da pynman ynne ka sngi da kut ko du hapoh 35 minit donhi khlem em kawon kawon ka mat yaklam hajrong ki kaam ka Council lait noh na i por wa wanrah phang kylli u Marki Mulieh MDC wa ka Official Report wa wanrah da u CEM hajrong i pynku kyrdan ya u uwi u Junior Engineer.
Chwa wow sdang ka da em i klam sñiawsih yei khlaad syndet u MDC wa rim u Yoshida Shylla u MDC warim ka JHADC uwa da khlaad ha kini ki tayaw wa dadep heiwa da suki jar kam wow burom ya oo.
Haka kynta kylli u Marki Mulieh da booh kylli u chaphang ki post Grade I, Grade II, Grade III wa Grade IV tangwa ym yoh ya i jubab wa pura na u CEM u Thombor Shiwat.
U Marki da paan u leh yei pynche na ka Executive Committee hajrong i pynskem ya u Dameshwa Langbang wa ka Emidahun S.Wann haka post Junior Engineer khlem khut advertisement, wei neiliang u CEM da ong u wa ya kini ki arngut da thung hadien wa da wan ka scheme Special Assistant Grant neibhah wa da yoo yei boonkaam wa jhan wei da thung ya ki.
U Marki da kylli u leh yei thung Acting Dolloi ya ka Elaka Sutnga wei da kylli u leh chaphang ka China Bazaar wei da jubab wa da dep e Trading License ha ka 29-05-2012 wei u tre ko toh u Arashad.
Hawa yaklam wa u CEM ka Council u Thombor Shiwat hadien wa kut ka dorbar da ong u wa yooluti bha u wow mih boon chooh ki phang hajrong ka China Bazaar tangwa u Marki ym em u tot u chaphang yong ka.
Discussion about this post