U Director ka chnat Soil & Water Conservation Meghalaya, u L. Shabong hawa wan sakhi kam u kongsan yei lehkmen World Environment Day 2026 wa da pynman da ka yung krehkaam u Divisional Soil & Water Conservation Officer, Jowai Territorial Division, WJHD chirup i yakrehlang ka Kur Sookpoh Khad-Ar Wyrnai, Jowai wa da pynman ha ka 19 tarik ha District Library Auditorium, Mynthong, da pynsñiaw u i yaroh yei lai luti kani ka chnat ha Jowai wa kamjooh ya ka Kur Sookpoh Khad-Ar Wyrnai kawa em i mynsien wow ya krehlang hajrong kani ka thong, deiwa e leh ya ka thaw yong ka kawa em ha Mynthong hi neibynta u pynman i thung dieñ ha kani ka sngi.
Hawa pynrap hajrong i emkaam u yada wei wow pynneh pynsah ya ka rymaw, ka soodong sookun kawa chong sah i, da ban joor haroh u hajrong i kordor ka um wei wa kammon u kune ya ka.
Ong u wa katkam ka yukheiñ ka jylla yong i toh kawa yoh um ym duna yaka 63.2 Billion Cubic Litre ka um. Katkam ka Report wa pynmih ka Central Ground Water Board ha u snem wa dep ong ko wa ka Dynamic Ground of Water Resources Data man ko du 1.86 Billion Cubic Litres yoh i wow pynlang um hapoh khyndaw katwa iwa tam da kai sepai hi-eh ko heipor slap cha Ri Thor iwa da wanrah chiboon i dooh nong.
Wei i daw wa ka um ym yoh de ko u ngam chapoh khyndaw toh wa ki loom yong i da syllen ki wei ym ye ksoh de ki ya ka um.
Da batai pynche haroh u hajrong kammon u ksoh ya ka um khnang wa ki um changpet wa psa yei im u man kiwa neh.
Pyntip haroh u wa ka jylla Meghalaya da mang ko wa la kammon kammon toh u em chi lak tylli ki um changpet, wei ha ka Survey wa dadep leh hadooh katni 50,000 tylli na ki um changpet wa em, da em kiwa da duna i mih ka um wei em won leh kiwa da sngad.
I daw toh nei kylla ka suiñbneiñ heiwa u slap wa toh u yoh ha Khasi Jaiñtia nadooh u bnai May hadooh October katni da duna u.
Hawa kyntu u ya ki paidbah wow pynlang ya ka um slap wa haap ha ki tnoom yung wei wow e laad leh ya ka um slap u ngam ko chapoh khyndaw ha ki pchem yung. Da sñiawngooh u leh ya ka sorkar wa ha uni u snem da e ki yei kyrchaan poisa na ka Asian Development Bank neibynta u chna ya ki Small Harvest Structure yow ksoh ya ka um.
Da mang leh u chna 533 tylli kini ki Water Harvesting Structure deiwa yooluti u yoh 15 Million Cubic Liter ka um.
Kiwi won wa e i klam ha kani ka sngi kynthup ya u Puramon Kynjing, President ka Kur Sookpoh Khad-Ar Wyrnai uwa man leh u Dolloi ka Elaka Jowai, u Dr. H.H. Mohrmen, u L. Pohktai, Divisional Soil and Water Conservation Officer Plantation Crop Division Jowai wa kiwi.
Hadien wa kut ka yalang na District Library da mih lai chimbynta yonglang won ki hei thung dieñ ha i thaw ka Kur Sookpoh wa em ha Mynthong.
Discussion about this post