Ha i lehkmen World Environment Day 2026 wa pynman da ka yung krehkaam u Divisional Soil & Water Conservation Officer, Jowai Territorial Division, WJHD chirup i yakrehlang ka Kur Sookpoh Khad-Ar Wyrnai, Jowai wa da pynman ha ka 19 tarik uni u bnai ha District Library Auditorium, Mynthong, neiliang u Director Soil & Water Conservation Meghalaya, u L. Shabong da wan sakhi u kam u kongsan hei emlang kiwa yahkhmat na ki chnong waphær waphær ka Jowai, ki khynnah skur, kiwa sikai wa kiwa chah khut sñiawbha.
Neiliang u T. War, Divisional Soil & Water Conservation Officer, Jowai Territorial Division hawa klam hajrong ka phang yong kani ka sngi kawa ong, “Inspired by nature. For climate. For our future”, ong u ka pyrthai wa chong sah i toh deiwa chim kylliang naka pateiñ wa da lai, wei kamwa da yoh i na ki da toh i won wow sumaar ya ka khnang wa ki pateiñ wow wan leh u yoh ki ya ka rymaw wa khooid wa yoosuk wa ki um ki wah wa khooid.
Da pynkynmoo haroh u yei man i long ka chnong Jowai nachwa weiwa katni nadooh ki loom ki kpær, ki um ki wah, deiwa kdaw u yei maa ka Wah Myntdu kawa da maad bha yei chah leh taroi khamtam hawa wan u slap nyngkong neidaw waroh ki tngit wa mih na ki yung ki sem tooid ki cha kani ka wah.
Heiyatoh wa ka Wah Myntdu pyntip u wa da em ki ya ka thong kammon u pynneh pynsah wei wow pynkhooid ya ka, kamtæ khut u i yakrehlang yong waroh deiwa sdang na jar jiar ki yung ki sem neibhah du samen ym ye u leh iyi iyi.
Ong u wa lada ye i wow pynkhooid biang ya kani ka wah, daw man i kyrkhu ya ka pateiñ wow wan.
Wei i e wa kongsan ya ka pateiñ ymtoh da ka spah ka phaw tangwa iwa kongsan tam toh ka spah rymaw.
Ong haroh u kamwa waroh ki wah sdang ki na ki um changpet, kamtæ ha u snem 2021 wa poi kreh u ha Jowai, kawa nyngkong wa chim u wow leh toh i thooh bniah yong oo ya waroh ki thlu um hapoh Jowai deiwa leh da ka Map Geo Tag.
Chem u wa na ki 524 tylli ki thlu um ha chnong Jowai, 120 tylli toh kiwa mih neiwa em ka Khloo Langdoh kawa heh kamwa 4.34 Hectare, katwa na ka Khloo Mooliksoo kawa heh 2.43 Hectare pynmih ko 55 tylli ki thlu um.
Wei na kini ki ar tylli ki khloo wa da pynneh pynsah hapoh ka chnong Jowai, na ka Khloo Langdoh 4 tylli ki dorbar chnong wa yoh um, na ka Mooliksoo won 6 tylli ki dorbar chnong.
Chooh chooh ong u wa i mih boon ki um changpet ha sor Jowai bar ya kiwi ki thaw toh wa ha Jowai em ko yei man i long ka khyndaw kawa ye u ksoh ya ka um.
Heijooh i por ong u kini ki khloo ym du wa pyndap um ki, tangwa ksoh ki leh yaki la’ær bih næ Carbon Dioxide wa mih na ki kari, ki yung ki sem deiwa e won cha ki paidbah wa chong chnong ya ka la’ær wa khooid wa pyngngaad.
Ha kani ka sngi da pynkynmoo haroh u yei emkaam u pynlait thaw ya ka um u ngam ko chapoh khyndaw neibhah wa mih um ha ki thlu um.
Discussion about this post