U Vice President ka United Democratic Party uwa man leh u Montri ka sorkar wa pait ya ka chnat ki kaam pohyung ka jylla, u Lahkmen Rymbui da ong u wa ka UDP ymjooh leh næ ym leh ko ya kiwon kiwon ki kaam wa man pyrchah næ wa pynemkaam bakla wow yoh myntoi ka Party, deiwa pynrap leh wa ki sahep emkaam wow kreh ki katkam wa da pynkup bor ha ki da ka aiñ.
Da ong u wa i pynbaad ka Congress ya ka UDP toh nei sñiaw wiarnar ko hadooh ym em de ko ha i bor wei wot katni leh ym yahaap yumut de ko wot para ki leh wei ini daw wanrah i yei yapiah ko cha ki 2-3 bynta ha ki sngi wow wan.
U Lahkmen da ong u ya ini hawa jubab yeiwa pynbaad u Vincent Pala wa ka UDP da emkti ko hei khrong dan pyrchah aiñ ha ki sarokbah wei hajrong ini u Lahkmen da ong u wa ka Congress da toh kawa da jooh mlien wow pynbaad wei iwa sñiawsih dooh toh wa u President wa thymme ka MPCC da pynbaad u wa ka UDP da emkti ko hei khrong poisa tooh.
Chooh chooh, u Lahkmen da ong u wa ka Congress da em ko ha i bor da boon snem wei da tip bha ko kammon wow thung ya ki Montri.
Da ong u leh wa chong i bor du ha u Montri Rangbah wow thung næ bhah kreh ya ki Montri, deiwa ong leh wa da pynsñiaw u ha u Montri Rangbah wa kwah u wow pynlait noh ya ka chnat Pohyung, tangwa u Montri Rangbah dang bichaar u yeini wei ini da pynman i ya oo wow pteiñ u ksoh ya kani ka chnat.
