Ka Meghalaya Pradesh Congress Committee (MPCC) da kam ko wa i lai wow ya krehlang waka seiñ NPP hapoh ka EC wa da e pyrtuid Khasi Hills Democratic Front (KHDF) toh neibynta wow yoh wow e yumut bha hawa yatoh wa i pynkylla namo ka Amendment ya ka Sixth Schedule.
U Vincent H Pala uwa man u President ka MPCC da ong u wa ka Congress ym em ko yei thmu wow pynhaap ya ka Executive Committee yong ka UDA wa da yahkhmat da ka UDP hapoh Khasi Hills Auronomous District Council, tangwa toh i yachrut para ki iwa da pynhaap wei hadien itæ won da khut ya ka Congress wow ya krehlang.
Ka MPCC da pynlang ko ya waroh ki wakreh ka Party ynne ka sngi yow pynche hajrong i lai ya krehlang waka NPP ha KHADC hadien wa da haap noh ka Executive Committee wa ya krehlang ka UDP waka NPP hapoh yong ka United Democratic Alliance.
Hawa klam wa kiwa thoh khubor, u Vincent Pala da ong u wa neibynta wow janai i pynkylla ya ka Sixth Schedule, da mylliñ ya waroh i yaphær wei neibynta ini i kaam, ka seiñ ka smat ko wow ngooid ya iyi iyi, deiwa ong wa ka seiñ ye ko wow lai cha sarok wow pyrchah ya ka BJP hajrong ini i pynkylla, næ wow pynmih ya kawi ka rai hapoh District Council wow e yumut hajrong itai i pynkylla.
