Tura: I duna thaw sah ki khynroo khyllood wa lai College man ko kawi na ki daw wa kiwa wan puræ na nongkyndong chem chitom ki wei man ko u moochynthut waka sorkar jylla hadooh katni dang thooh laad ko wow pyndooh noh yow yoh sakhiat ya ka tæ ka laad puræ puthi ya waroh. Ka sorkar da thooh laad ko leh wow yakrehlang wa ki seiñ hadooh ki seiñ niam yow ye u wai ya ki Hostel.
Yeini da ong u Montri Rangbah ka jylla u Dr. Mukul Sangma hadien wa wai u ya ka hostel thymme wa tip kam ka Tribal Girls’ Hostel ha Hawakhana, Tura ynne ka sngi. Kani ka Hostel toh kawa chna hapoh ka Article 275(1) ka Union Ministry of Tribal Affairs kawa pynkrehkaam da ka sorkar jylla lyngab ka tnat Social Welfare Department wa ka Women’s Economic Development Society (WEDS), Tura.
U Dr. Mukul ong u i duna thaw sah kiwa lai puræ hapoh ri-loom Garo toh iwa yoo chyrkhei neibhah wa kiwa pass ya ki exam waphær waphær kam ki Board Exam da poi ki du 36% donhi. Da ong u leh i duna i rukom sikai ha ki kyrdan Elementary heiwa kiwa sikai leh ymtoh kiwa chimkhia da pyndooh mynsien ko khamtam ya kiwa wan na ki yung wa dooh wa duk.
Da ong u leh wa ha ka Teachers’ Training Programme wa da sdang ka sorkar jylla daw e ya ka grant wa T. 5,000 cha kiwa em sakhiat i thrang wow man kam kiwa sikai.
Katkam wa pyntip u Director, WEDS, Rev. F.D. Sangma, da e poisa T. 1 Klur wow chna ya kani ka Hostel ha i thaw wa em ha Hawakhana kawa da e da ka WEDS yow chna ya ka.
Chooh chooh da ong u wa kani ka Hostel da ye u pyndep ya ka heiwa ka imlang sahlang da noh synniang poisa ki T. 15 lakh heiwa 30 ngut ye ki u sah ha kani ka Hostel heiwa 25 ngut da booh kyrpang ya kiwa wan na ki manyung wa dooh wa duk. Ya kani ka hostel daw pait da ki 8 ngut ki dkhot ka Managing Committee, uwi u warden, arngut kiwa chet wa uwi u chowkidar.
U Montri Rangbah leh kular wow yarap ya kam kini ki jait kaam wei da kyrpaad u leh wa ya ki wa ki 25 ngut ki kynthai toh ki wow wan ki na 25 tylli ki chnong ka ri-loom Garo.
Discussion about this post