Hawa pynche hajrong i pyndooh Ticket NPP ya u MLA wa katni ka Phulbari, u SG Esmatur Mominin deiwa e Ticket cha u MLA warim utæ u AT Mondol, u Conrad K Sangma da ong u wa ka thaaiñ da dooh ko ya kiwa boon ki kaam pynroi hanlada ki Scheme da pynlait bha cha uwa mihkhmat ka Constituency.
Da kynmoo u leh yeiwa ong u pa yong oo, u PA Sangma wa emkaam u chakri ya ki paidbah ymtoh ya ka poisa. Kamtæ da ong u wa uwa mihkhmat paidbah ya ka Constituency hanlada da pynlait chiboon leh tangwa ym em poi cha ki paidbah kiwa da chah ieh beiñ wei na ini i daw da chim ya ka rai wa da chim neibhah ka NPP toh kawa booh hakhmat yei emkaam ki paidbah.
Da ong u wa i daw wa jied ya u AT Mondol toh wa jooh ong u pa yong oo ham kdong yei bor wa ka spah wa ka chuki tangwa emkaam u kreh neibynta ki paidbah wei ki wow su kylliang yeiwa da lehbha.
Da ong u leh ini i rai da pynchrai i ya kiwa boon heiwa ki bru da pynsñiaw ki ya i wym sñiawsuk ki deiwa klam pyrthai ha ki rynsan Social Media wei ha Facebook da yalap ki bru wow pynsih yei pyrtuid u tangwa oo da yieñ skem u hei rai wei ym bien u leh wow jubab ya kini kiwa pynbaad.
Chooh chooh da ong u wa kam kiwa yahkhmat ymtoh u pynyaphær ya ki bru wei ymtoh u raikot wow chimkabu ya ki paidbah deiwa yaroh leh ya u A T Mondol kam u bru nadooh nachwa uwa kreh salonsar ya waroh ki jaitbru ha kylleiñ ki thaw.
