Shillong: U montri wa pait ya ka tnat puræ puthi ka jylla, u Lahkmen Rymbui da ong u wa ya ka tulop wa sahkut kattu la san bnai yong kiwa sikai SSA daw e noh ya ka ym slem de du hadien wa pynlait ka sorkar pyrdi ya ka poisa.
U montri da ong u ya ini ynne ma sngi ha ka yalang lehkmen ya ka ka sngi burom ya kiwa sikai ha U Soso Tham Auditorium, Shillong.
Hawa kdaw yei yakhih kyllaiñ myngor kiwa sikai ha poh ka lama yong ka All Meghalaya SSA School Teachers’ Association (AMSSATA) wow dawa wow pyllait noh ya ka tulop wa sahteiñ, u Rymbui da ong u, “Nga tip O wa em kiwa sikai kiwa pynman ya ka yakhih ha i thaw pynyieñ kari wa em ha ka Additional Secretariat. Ki tip ki leh yei eh i khoo da jia wei ym em murieh ka sorkar jylla yeini neibhah ini da jia i neidaw wa slem ka sorkar pyrdi wow pynlait poisa,” da ong u Rymbui.
Ka AMSSATA deilang waka All Garo Hills SSA School Teachers’ Association (AGHSSATA) wa kiwa sikai na Ri Bhoi, South West Khasi Hills wa West Khasi Hills District, da dawa ki wow pynlait noh ya ka tulop wa sah san bnai kattu kawa man T.19, 044 chi bnai neibynta kiwa sikai Lower Primary wa T.20, 493 neibynta kiwa sikai Upper Primary deilang wa ka Arrear.
Katwa neiliang ka seiñ Meghalaya Sarva Shiksha Abhiyan School Association (MSSASA) won ym em chibynta ko wow pyrchah ya ka lehkmen ya ka sngi wa kyrpang kiwa sikai.
Discussion about this post