Ka Jaiñtia National Council (JNC) Ladrymbai Circle, da pynsñiaw ko yei sñiawkhia wa joor hajrong i sahkut kari ha Ladrymbai khamtam ha tymbud u sarok NH6 kamjooh ha Rymbai Road, iwa da wanrah yei eh iwa khroo ya ki paidbah.
Katkam i ong u President ka JNC Ladrymbai Circle, u Jopsing Latam, i khynnia sarok toh neidaw i pynyieñ khlem akor wei khlem pyrkhat kiwa booh kari ha rood sarok, khamtam ha ki por wa boon bru, wei ini man i i daw wa wanrah yei sahkut kari man-i-por, iwa da ktah ya kiwa lai wa wan man-ka-sngi nadooh ki khynnah skur hadooh ki kaam wa jhan yong waroh.
Ka seiñ da pynsñiaw chooh chooh ko wa i wym em ki pulit wa pynlai kari ha kitai ki thaw da pynjoor ko yei eh, wei da wanrah leh yei kulmar wa i pynslem ya i lai i wan yong ki kari.
Hajrong ini wa jia, ka JNC Ladrymbai Circle da lai ujor ko ha u OC ka Ladrymbai Police Outpost wow leh u chsiendon yeiwa emkaam. Ka seiñ da kyrpaad kyrpang ko wow booh ym duna ya ar ngut ki pulit pynlai kari ha kitu ki thaw wa joor i sahkut khnang wow pynbait ya ka lai ka wan wei wow pyntikna leh yei lai i wan iwa suk.
Ka seiñ da pynsñiaw ko yei kyrmen wa ki bor pynlai yeini i kaam u chimkhia ki ya ki laad ki luti kiwa emkaam wow pyndooh noh yeini i eh i khoo neibynta i suk i chngaaiñ yong ki paidbah.
Discussion about this post