U Montri sorkar uwa man leh kam u MLA ka United Democratic Party (UDP) na West Shillong, u Paul Lyngdoh da beiñ u ya ka Voice of the People Party (VPP) kawa ym du wa pynkylla kaam Politics tangwa da wanrah ko leh yei sñiaw yaphær jaitbru wei pynkulmar hapoh ka imlang sahlang hajrong ka phang Reservation Policy waka Roster System.
“Nga da dep O wow klam hajrong ka Reservation Policy nadooh 20 snem nachwa, heiwon u heitu i por?”, da kylli u Paul uwa jooh man leh kam u President ka Khasi Students’ Union. Wei yeini da ong u hadien wa poor i Video iwa klam u hajrong ka Reservation Policy ha u snem 2002.
“Ini i Video toh i sabut wa u Paul Lyngdoh da sai u ya kani ka phang Reservation 20 snem nachwa, katni kylli O heiwon ki Video wa u Ardent da pynsñiaw u yei sñiawkhia ya ka Reservation Policy 20 snem nachwa. Oo leh man u kam uwa yahkhmat seiñbhalang ha kitu ki por tangwa ym jooh em wan u chakhmat wow kyrchaan yei dawa ka KSU”, da ong u Paul.
U Paul da ong u wa u Ardent da wiar u ha itu i por hawa dawa wow pynkylla ya ka Reservation Policy 20 snem nachwa neidaw wa man u kam uwa yahkhmat ka Federation of Khasi Jaiñtia and Garo People (FKJGP). Kamtæ u Paul da ong u wa ini toh i daw wa u Ardent yait u wow e kyntien iyi iyi hajrong kani ka phang ha itu i por.
Hawa kylli won ileh wiar u Paul hawa yakhih ka VPP ha kini ki tayaaw wa da dep, da jubab u wa oo kam uwa da jied da ki paidbah kam u MLA, u leh yei kaam kam uwa chna aiñ kamjooh leh kam u Montri sorkar.
“Ya i da jied kam ki MLA, nga ym sñiawthooh O iyi i daw wow pynman yalang paidbah du hadien 3 bnai wa chna ya ka sorkar thymme”, da ong u Paul.
Da kynthah u leh ya u heh ka VPP, u Ardent M Basaiamoit uwa man MLA heipor ka sorkar u Mukul Sangma 8 snem, “Ileh wa suki hi-eh u heipor wa synchaar u Mukul Sangma kam u Montri Rangbah 8 snem, ileh won katni?”, da kylli u Paul.
