U MLA ka Amlarem uwa man leh u Montri ka sorkar jylla, u Lahkmen Rymbui da ong u wa sñiawkmen u wa na waroh, kani ka sorkar MDA wa katni da kreh sakhiat ko yei kaam khamtam hapoh Amlarem Constituency nadooh ki sarok, ki thaw sumaar wa kiwi kiwi wei yeini da ong u hawa kylli heiyatoh wa lada sñiawhun u hajrong i kreh yong oo ha ki soo snem wa dadep kam u MLA, wei da kyrmen u wa daw ye wow leh chooh chooh ha ki por wow wan.
“Nga da hun O ya iwon iwon iwa da kreh O ha kini ki soo snem piah wa da lai,” da ong u.
Da sñiaw skem u leh heiyatoh wa kani ka Election wow wan deiwa ong wa da chimkhia u wow kreh ya ki kaam wa yatoh wa i roi i paar.
“Ha ki por yong nga ha kani ka kynti kamwa 150 Km ki sarok da yoh Sanction hapoh ka Constituency yong nga, ki um baam um dih ki wym yoh lyngba ka JJM da yoh lyngba ka RIDF kawa man ka State Scheme,” da ong u Lahkmen.
Da ong u wa neibynta ki warep da chna ka yingkieñ wa T. 64 lak yow suk ki, ki skur leh kamwa 10 tylli da chna lyngba ka chnat puræ puthi heiwa 4 tylli ki skur lyngba ka Border Area Development Dept, lyngba ka sorkar wa katni da mang ya 10 tylli ki L.P. School, ki High Secondary School wei da yoh u pynthymme ya ka skur Sohkha heiwa ka Nongtalang da yoh ko ya ka yung wa thymme.
Chooh chooh da ong u wa ka Pdengshakap Residential School kawa nyngkong dooh hapoh ka jylla u krehkaam ko ha u snem wow wan neibhah hapoh uni u Naichiphaw u Sanction neibynta ka Running Cost heiwa ye u man lyngba ki NGO næ ka sorkar heiwa u sdang leh ya ki Class IX hadooh Class XII ha ka Commerce wa Arts.
Da ong u leh wa daw pynmih leh yaka kot wow bichaar ya i kreh hapoh ka Amlarem Constituency hadooh u snem 2022 khnang wow yoh ki paidbah u bichaar leh kamjooh wow yoo sakhiat ki ya waroh i myntoi i roi i paar wa ka Amlarem da yoh ko hadooh ynne ka sngi.
“Nga 100% kyrmen O wow jop neibhah kat chawa lai leh ki paidbah e ki yei yakrehlang, deiwa ong leh wa ha ka Election em bait i klam pynbaad wei i mih ki kattu katni tangwa rap boon won kiwa psiah,” da pynkut u Lahkmen.
