U Lahkmen Rymbui uwa man leh u Montri Kaam Pohyung ka jylla, da ong u wa lada u Ernest Mawrie em u hei thaw yong oo, ye u wow iehnoh yei kaam, deiwa pynrap, ‘Nga ym toh u tieñslah, nga toh u War u wym kynrandien na iwa eh wa i kitkhlieh’. Da ong u wa lada em iwon iwon i jia toh i kamram yong oo wow kreh yow pynbait.
Kam wow pynkynmooo wa u Ernest Mawrie da dawa u wa u Lahkmen Rymbui toh u hiar chuki noh u hajrong i yap yong kiwa mylla tih mooyong ha Dienshalalu, East Jaiñtia Hills khnang wa ka takit ya ini i jia u man ko kawa laitlooid.
Hawa yaklam ynne ka sngi, u Rymbui da ong u wa chim u ya i dawa yong u Mawrie ha ka liang wow tei, wei toh i kamram yong oo wow kreh bait katkam wa chah ka aiñ. Da ong u wa lada ka BJP ka dawa ko ya oo wow hiar chuki, kam ka Party kawa heh ha ka ri India, toh u pait ko leh iyi jia ha ka Party yong ki cha kiwi ki jylla, ym du wow kdaw kti ha kani ka jylla.
Da ong u pdiang sñiawbha u yei pynbaad na waroh ki liang, neibhah katwa dang chah pynbaad u, dang ye wow pynbha ya ki kaam, deiwa pynrap wa waroh emhok ki wow pynbaad wei oo leh emhok u wow kreh bha ya i kaam katkam wa ye u.
Hawa kylli chooh chooh, u Rymbui da ong u wa chong ha ka chuki kam u Montri ha ka sorkar dewai neiliang yong ka Party UDP wa ki chnat da pynkup ha oo toh katkam i yoo biang u Montri Rangbah wei kini waroh ar ki ye ki wow chim rai hajrong yong oo, ym toh da ki Tom, Dick & Harry
