Shillong: Hadien wa ka sorkar jylla da pynuiñ biang ko ya ka Bill ka Khasi Hills Autonomous District Council ka Khasi Social Custom of Lineage Act (Second Amendment) Bill, 2018, u CEM ka KHADC, u HS Shylla da khut u ya ka yalang wa jhan ya ka Executive Committee yong oo ynne ka sngi wow chong phyllu yumut ya ki kyndon ha kani ka Bill wa da mynjur nadooh u snem 1997.
U Shylla da pyntip u wa ka EC da rai ko wow phah ya ka Consultative Committee kawa da khlieh da u Mansturdy Nongrem, MDC ka Langrin wow e yumut wei wow bichaar ya kani ka Bill wa da wanrah da ka KHADC.
Hajrong won wa i pynuiñ ka sorkar jylla ya ka Bill, u Shylla da ong u, “I sñiawsuk wa em ka ya krehlang hapyrdi ka KHADC wa ka sorkar jylla.”
Da pyntip u wa ka First Amendment yong ka Bill da leh ha u snem 2015 wei daw pyndooh noh ya ka wei daw chna noh da kawi ka aiñ neibynta ki kur Khasi.
“I da booh i ya ka Consultative Committee wow chong ki mynstep ka sngi wei kani ymtoh kawa chim por neibhah i bakla toh iwa malu malæ,” ong u CEM.
U Shylla da ong u leh wa hadooh ka Supreme Court da pynmih ko ya ka hukum wa ym kwah ko wa kiwi ki jaitbru wow tymmoh ki ya ki bru wa khian paaid yow yoh ST\SC ki.
Heiyatoh won wa kiwi ki man bru kiwa ym sñiaw yatoh wa man ki ki chynrang namo ki kynthai kawa tip da i ktien pharæng kam ki Third Gender wa kammon kani ka aiñ u krehkaam ko, u Shylla da ong u, “Heini ym tipmit ki ya kiwi ki jait man ki bru wei tipmit i du ki chynrang wa ki kynthai.”
“Ye i u pynchrai ya ka Supreme Court namo ya ka sorkar India, tangwa ymye i wow pynchrai ya u Blai,” ong u CEM.
U CEM da ong u leh wa i wanrah ya kani ka aiñ daw yarap ko wow sylli yei yoh ya u khniang HIV.
Katkam wa ong u Shylla u kniang HIV da poor u hapoh kani ka jylla toh nei wan kiwa yah truk wa kiwi ki baar jylla kiwa wan kreh mylla ha Meghalaya.
“I da yoh i ya ka bui (report) wa da chem wa u khniang HIV joor u ha ki sarokbah, iwa pynyoo wa da wanrah da kiwa yah kari na ki baar jylla.” ong u CEM.
Discussion about this post