U CEM ka KHADC, u Titos W Chyne da pynsñiaw u yei sñiawkhia hajrong i jia ynne ka sngi ha Umlaper, Block II Ri-Bhoi District heiwa u MP yong ka Karbi Anglong, Assam u Horensing Bey, u MLA ka Boithalangso, u Rupsing Teron, u EM ka KAAC, u Pardeep Rongpi da wan wai ki ya ka Stadium.
U CEM da pyntip u leh wa da yoh pdiang ya ka chithi na u Charles Marngar, MDC ka Mawhati uwa da pyntip chaphang ini i leh ka sorkar Assam.
U CEM da ong u kani ka thaw toh kawa dang haap hei pynbait khappood hapyrdi ka Meghalaya wa Assam wei ha ka yachem wa khaddooh heiwa da yachem ka Deputy Commissioner ka Ri-Bhoi waka Deputy Commissioner na ka West Karbi Anglong District Assam da yaklam wei da rai wow burom ya ka Status Quo kamjooh leh ka sorkar jylla Meghalaya wa Assam da ong ki wow pynneh wei burom ya ka Status Quo.
“Ya iwa katni won katwa i yaklam dang lai i, ym toh wow em iwon iwon i chna lane wow wai ya iwon iwon i chna, wei ini da pynkhryngiat wow yoo yei leh embor yong ka Assam wa i leh arsap wa wot hadien wa da lai i yaklam leh tangwa ka Assam da pynyoo dei yong ka hi i bor,” da ong u Chyne.
Da ong u leh wa ini wym bna wei leh arsap ka sorkar Assam kawa na khmat da ong wow pynbait pood, dei dien won dei kamwi man ko iyi iyi wa sñiawsih neibhah wa du kat ka luti lai kjat da pyrchah ki u chna, wow lai ki seiñbhalang wow pynman yalang leh ym chah wa chah khang wei beh ha ki pulit heiwa ki pulit ka Meghalaya leh beh ki kamjooh ki pulit Assam leh beh ki wei ini da man i iwa sñiawsih wei kam ini man ko i dai sarom ya ka sorkar jylla wei da ktah yei burom yong ka sorkar jylla hi waroh kawi.
Kamtæ u CEM da kyrpaad u ya u Montri Rangbah wa ki bor wa haneiñ wow chimkhia hajrong ini wei kam kiwa yahkhmat ka KHADC leh daw khut ki ya yalang wa jhan wa ki MDC na katai ka thaaiñ wa ki bor pynlai næ synchaar chnong katai ka thaaiñ wei daw phah wan ya u Syiem ka Raid Nongtung yow ya pyrkhat khia hajrong ini.
