U montri ka kaam pohyung ka ri u Amit Shah ynne da pynsñiaw u ha ki dkhot ka sorkar jylla wa yahkhmat da u montri rangbah u Conrad K. Sangma wa ka sorkar India dang puræ bniah ko yaka rai ka Meghalaya Legislative Assembly wow dawa pynkrehkaam yaka Inner Line Permit (ILP) hapoh ka jylla.
“Ki lok ka MDA ynne ka sngi da yachem ki wa u montri ka kaam pohyung ka ri u Amit Shah yow pynbor yaka sorkar India wow pynkrehkaam yaka ILP wei da ong u wa ka sorkar India dang puræ bniah ko ya kani ka kaam,” da ong u Conrad K. Sangma.
Kiwa yachem wa u Shah kyntup ki ya u Dy Chief Minister u Prestone Tynsong, Sports Minister u Banteidor Lyngdoh, Urban Affairs Minister u Hamletson Dohling, Chairman ka Meghalaya Planning Board u Lambor Malgniang, u MLA ka UDP u Nujorki Sungoh, Govt. Chief Whip Marcuise Mark (NPP), u MLA ka HSPDP u Renikton Lyngdoh Tongkhar wa u MLA ka KHNAM u Adelbert Nongrum.
Haka yachem kawa neh 40 minit ynne i miet, neiliang u Amit Shah da ong u wa ka Meghalaya ym hap ko wow khuslai neidaw wa ka sorkar India ym pyntlot ko ya i hok ki jaitbru ri-loom (Tribal Rights).
“Ka Constitution ka India em ko boon ki kyndon wow yada yei hok ki Tribal wei ka sorkar India ym chah ko wow pyntlot yei hok yong ki ha iwon iwon i rukom. Lada em wa jia wa chah ktah i hok ki jaitbru ri-loom, ka sorkar India daw ya krehlang ko waka Meghalaya yow yada yei hok ki paidbah. Ha waroh, ka sokrkar India u pyntikna ko wa i jaitbru ri-loom daw yada ya ki,” da pyntip u Conrad wa ong u Amit Shah.
Ha kani ka yalang da yaklam leh ya ki kaam pynroi khamtam wow yada ya ki thaaiñ khappood.
Neiliang kiwa lai mihkhmat yaka Meghalaya da pynsñiaw ki yei sñiawhun waka sorkar India da pynyoo ko yei sñiawkhia ya kani ka kaam wei da yooluti ki wa daw mankaam ko.
Discussion about this post