Shillong: Hadien wa ka sorkar da e laad ko wow wai noh ki thaw mane Blai nadooh 1 tarik u Naichiphaw deiwa booh boon ki kyndon wa hap wow bood. U MDC ka Congress na Mawhati, u Charles Marngar ynne ka sngi da ong u wa da pynrkhiñ palat ka sorkar ya ki kyndon ya kiwa lai cha ki yungmane hawa ya nujor wa ki kyndon wa da booh ha ki thaw wa pynman yaw.
Da ong u wa ki kyndon neibynta wow pynlai ya ki yungmane da em ki hadooh 5 sla (Page), katwa ki kyndon ha ki yaw næ ki thaw paidbah em ki du 3 tylli. Katkam i ong u Charles hawa yatoh waka kyndon wa 13 na kawa 3 hawa yatoh wow pynbaptist, da ong wa da chah wow lehniam du deiwa pynemkaam da ki sapkti, tangwa ha ka Sub Para (c) da ong won wa ka lehniam toh u leh khlem da pynyabi para bru, wei ini ye ko wow booh yei eh wei neiliang u MDC da booh u yei kyrpaad ya ka sorkar wow pynbait biang ya kani ka kyndon.
Da ong chooh chooh wa ha ki Balang ha nongkyndong, ka sorkar toh u pynyinsur ko ya ki kyndon neibhah kamwa man kattæ, ki paidbah da im ki kamwa jooh man hadooh katni, wei lada pynman lang ya ki yaseiñ toh du para chnong kiwa lai cha ki yungmane.
U Marngar da ong u wa ki kyndon wa da booh da ka sorkar ya ki thaw lehniam da boon palat ki, wei lada ya nujor wa ki bru kiwa lai cha ki yaw ki haat, ki paidbah kiwa lai cha ki yungmane smat ki wow kohngooh ya iwa phah wei rap khooid ki thaw bar ya kiwi, deiwa pynrap wa ini i pynrkhiñ palat ya ki kyndon, da em ki Balang wa chem yei eh wow wai ya ki yungmane.
Hawa kylli na u Director of Health Services (MI), u Dr. Aman War hajrong ini i pynrkhiñ ya ki kyndon hawa ya nujor wa ki kyndon ha ki yaw ki haat, u DHS da kubur u wa ki kyndon toh kiwa boon yow pynrkhiñ neibynta wow yada na i poor yong ka khlam, tangwa da ong u iwi na ki daw wa pynrkhiñ toh neidaw wa ha ki yaw, ki bru em ki ha ki thaw wa cha lait katwa ha ki yungmane toh ki thaw wa kset hapoh wa ha i jooh i thaw.
