Ka Open to All Knockout Football Tournament-2022 wa pynman da ka West Jaiñtia District Sports Association (WJDSA) Jowai, kam chibynta i lehkmen dap 50 snem ka seiñ dapoi ko cha ka yakhun Semi Final wa nyngkong ynne ka sngi.
Ka yalehke wa da pynman toh hapyrdi ka Jarain FC waka Iatylli FC Wapung wa jop da ka Jarain da 3-1.
Ya ka Jarain da thap kool da u Figo Syndai haka minit wa 34, u Shano Tariang haka minit wa 54 wa u Riborlang Dkhar haka minit wa 57. Ya ka Iatyllilang won da thap da u Kitbok Pale haka minit wa 60.
Ka Semi Final wa ar u pynman mynstep hapyrdi ka PHE waka Seinpynbhalang Sahsniang heipor 1:30 i sngi.
