Paan bor ka MPUF wow kynreh ya ki dukan dai tim

Kiwa kitkaam ka seiñ Meghalaya People United Front (MPUF) East Jaiñtia Hills District ynne ka sngi hapoh i yahkhmat u President, u K. Blah da e dorkhat ki ha u Deputy Commissioner ka East Jaiñtia Hills, neibynta wow paan bor wow kynreh ya ki License yong ki dukan dai tim ha ka District khamtam ha Lad Rymbai tangwa neidaw wym em u DC da e kti ya ka dorkhat ha u ADC.

Katkam wa tip ka seiñ, kiwa boon hi kini ki dukan dai tim toh ki wym em License heiwa du kawi ka License da booh ya 5 hadooh 10 tylli ki dukan.

Kamtæ neiliang u President da kyntu u ya ki bor ka District wow chimkhia ya ini i kaam neibhah i em kam kini ki dukan ktah i ya ka yarong poisa ka sorkar.

Neiliang u Vice President ka Sanchnong Unit, u Scientist Sana da ong u wa ka seiñ dawa ko ya ini wow khang ya ki dukan wym biang kot neibhah kawi ka License toh neibynta kawi donhi ka dukan.