U Montri wa pait ya ka chnat Arts and Culture, u Sanbor Shullai da kyrngah u yei dawa ki CRPF wow e thaw hadooh 50 Acre neibynta wow kyrriah ya ka ktem na Mawlai, ya kawa da booh ha i thaw yong ka chnat Arts and Culture ka jylla.
I dawa kyrriah noh ya ki CRPF na Mawlai da joor bha i ha ki snem wa dadep, heiwa kiwa yahkhmat na Mawlai wa kynthup ya ka Seng Samla Mawlai Pyllun wa kiwa yahkhmat chnong da pynjoor ki leh ya ini i dawa na u Montri Rangbah ha u snem wa da dep.
U Sanbor ynne ka sngi da khut u ya ka yalang wa ki sahep, ki pulit wa kamjooh ki CRPF ha kamra krehkaam yong oo neibynta wow pynsmat yei kyrriah ya ki CRP na Mawlai.
Hawa batai hajrong i mih yong ka yalang, u Sanbor da pyntip u wa ki CRPF da dep ko wow paan thaw na ka sorkar jylla hadooh 50 Acre ha New Shillong Township yow ye ki wow kyrriah noh na Mawlai. Heiwa u Sanbor da klam che u ya ki CRPF wa ka sorkar ym ye ko wow wa thaw kamwa da paan, tangwa da rai wow e du 5 Acre, wei itæ leh ki CRPF hap ki wow pynemkaam lang wa ki pulit ka jylla, iwa mut 2 Acre cha ki CRPF wa 3 Acre cha ki pulit ka jylla, wei i pait ya katai ka thaw waroh u haap i hapoh ka chnat pulit.
Da pyntip u wa ki CRPF da mynjur wa hun ki ya ka 5 Acre kamwa da mang da ka sorkar, heiwa da pynsñiaw ki leh wa mar ya yoh yei thaw, hapoh chi snem u pynbiang ya iwa emkaam yow mih noh na Mawlai.
U Sanbor da pyntip u wa ha i thaw yong ka chnat Arts and Culture daw booh ya ka Tribal Research Institute ha Mawlai kawa em yei heh wa 7 Acre wei hadooh katni kamwa 2.86 Acre da pynemkaam da ki CRPF.
Da pyntip u leh wa hadien wa ki CRPF mih ki na katai ka thaw, ka chnat daw lai pait ko yow chna da ki jait chna wow e myntoi ya ki paidbah ka jylla.
