Ka South Korea da man ko ka ri wa ar hadien ka China wa boon dooh wa yoh ya u COVID-19 heiwa da em 516 ngut kiwa yoh thymme ya uni u khñiang wei da em ki hajar wa yang yow yoh thaw thiah ha ki Hospital ka chnong Daegu.
Waroh kiwa da yoh COVID-19 ha South Korea da poi ko cha 5,328 ngut wei da yap 32 ngut, da pyntip ka Korea Center for Disease Control and Prevention (KCDC).
Kiwa boon na kiwa yoh ya u COVID-19 toh haka sor Daegu wa ki thaw wa em chajan, wei kani toh ka sor wa soo hei heh hapoh kani ka ri heiwa uni u khñiang da poor smat u lyngba ki Khristan yong kawi ka yaseiñ wa em ha kani ka sor.
Ka chnat i chait i khiah da dep ko wow Test ya palat 200,000 ngut ki dkhot kani ka yaseiñ kamjooh ya ki hajar ngut wa suba wa em ya uni u khñiang.
U Lee Man-hee, uwa khlieh dooh kani ka yaseiñ kawa tip kam ka Shincheonji Church of Jesus, da ngooh u wow paan maap hakhmat ki bru neidaw wa 60% kiwa da yoh ya uni u khñiang toh ki dkhot ka yaseiñ yong oo.
Da mih leh i dawa wow pynman yaka takit pyrchah ya u Lee neidaw wym em u yei kitkhlieh.
“Ym toh iwa leh chynnam wa pynpoor ya u khñiang,” da ong uni wa yahkhmat uwa la 88 snem. “Da pyrchang i katwa ye tangwa ym ye i wow yada.”
Ki dkhot ka Shincheonji Church of Jesus da suba wa da yoh ki ya uni u khñiang na uwi u dkhot yong ki wa wan na baar ri wei katni da e lut ki yei pyrtuid yong waroh ki dkhot yong ki, ki thaw wa pynman yaseiñ ki wa kiwi kiwi. Nyngkong da tieñ ki wow e pyrtuid neidaw wa khuslai ki ya chah pynmynsoo ki. Neidaw boon hapoh ka ri suba sih ki ya kani ka yaseiñ.
U Lee uwa yahkhmat ya kani ka yaseiñ da kam u wa oo toh u Jisu uwa da wan arsien katkam wa thoh ha Bible wei daw yah u ya ki 144,000 ngut cha bneiñ.
Discussion about this post