Ki khar mator wa sah ha Sweeper’s Lane ha Them Iewmawlong da paan por ki na ka sorkar yow pyrkhat yei pynkhreh ka sorkar yei thaw sah wa thymme neibynta yong ki.
Ka sorkar jylla hadien wa da dep ko wow pynkhreh ya ka ‘Blueprint’ namo i pynwandur ya ka thaw sah wa thymme yow kyrriah ya ki bru wa sah ha Them Metor, Them Iewmawlong, ynne ka sngi da khut pynman yalang biang ya kiwa kitkaam ka Harijan Panchayat Committee (HPC) yow batai ya ki yei pynkhreh wa ka sorkar da dep ko wow pynbiang.
Hawa klam cha ki laad pathai khubor hadien ka yalang, u Symbood Montri Rangbah ka jylla uwa man u Chairman ka High Level Committee wow kyrriah ya ki khar mator, u Prestone Tynsong da khana u wa ka sorkar da dep ko wow pynkhreh ya ka ‘Blueprint’ wei da rai wow e thaw sah ha i thaw wa em ka yung krehkaam wa chipor ka Shillong Municipal Board ha Bishop Cotton Road. Da khana u wa neiliang kiwa mihkhmat ka Harijan Panchayat Committee da paan por ki wow pyrkhat chwa para-ki hajrong itai i pynwandur wa da pynkhreh da ka sorkar.
Da ong u wa ha ka yalang da batai che ya ki wa i chna ya ka thaw sah toh ka yung mala (Flat System) neibynta u chniam lut waroh 342 tylli ki manyung kiwa em ha Them Metor.
Hawa kylli, u Prestone da ong u wa i hun lane wym hun, ka sorkar ym ye ko wow ong iyi iyi, tangwa ya iyi wa ka sorkar da rai da pyntip ya ki wa i thaw ym toh cheiwon cheiwon tangwa du ha Bishop Cotton Road.
Hawa yatoh wa ki thaw wa em ha Them Iewmawlong won, u Symbood Montri Rangbah da ong u wa ka sorkar da pynkhreh ko wow chna ya ka Shopping Complex ha katai ka thaw wei daw booh kyrpang ya ka thaw wow chong kiwa chongdai madan.
Neiliang u Secretary ka Harijan Panchayat Committee (HPC), u Gurjit Sing da ong u wa neiliang ka HPC daw bichaar bniah ko ya ini i pynkhreh wa da tyrwa da ka sorkar, neibhah ka sorkar da kyntait ko ya iwa kwah ki.
