Ka KSU lyngba ka Education Cell yong ka da thoh ko cha u Montri ka chnat i chait i khiah neidaw wa khuslai wei sñiawdiaw heiyatoh wa i suki ware i kreh yow pyndep chna ya ka Shillong Medical College.
Ka seiñ da ong ko wa ya ka Medical College da sdang ha u in 2017 ha Reid Chest hospital, Mawbah, Shillong da ka sorkar warim iwa da kyrriah won cha iwi won i thaw ha Umsawli, New Shillong deiwa e daw wa hap bood ya ki kyndon ka Medical Council of India (MCI) tangwa hadooh katni won ym em mih soh mih sla.
Ka seiñ da pynsñiaw yei dooh mynsien wow yoo ya ki khubor wa kawi ka Company na Kolkata kawa tip kam ka Kali Pradip Choudhuri (KPC) kawa da pynkit wow chna ya kani ka Medical College heiwa ka KPC toh kawa da bood naam yei wym su yei dan yong ka hapoh ka ri wa cha baar ri.
Ka seiñ da ong ko wa na i por cha i por da dep ko wow yaklam wa ki Montri ka chnat i chait i khiah wei da phah leh chiboon ki chithi wow pynsmat u pyndep yei kreh wei wow chong pyrkhat biang ya ka soskular wa da ya soi wa ka Company wa katni wa kreh yei kaam.
Kamtæ da paan pynche na u Montri hajrong ini yow ye u chakri yeiwa emkaam kiwa lai puræ Doctor ha ka jylla.