Ka seiñ EJNC-Khliehriat Circle ynnin ka 6 tarik hapoh i yahkhmat u President ka Circle u Synjoy Bareh deiwa em leh u General Secretary u M. Sukhlain deilang wa u Vice President u Mehun Nongtdu da lai e ki dei thoh cha u Education Minister, u Lahkmen Rymbui lyngba u Deputy Commissioner ka East Jaiñtia Hills District u E. Kharmalki heiyatoh wa i su bai skur yong ki khynnah ha waroh ki skur kiwa em hapoh ka District.
Katkam i thoh wa da phah, neiliang yong ka seiñ da booh ko da i pynkynmoo ya u Montri wa pait ya ka puræ puthi wa i em ka khlam COVID-19 da ktah joor sakhiat ko ya waroh hi ki bru nadooh uwa yoh hadooh uwa dooh nadooh ynnin u snem wa da sdang ya ka Lockdown heiwa ka kamai kajih yong ki bru da chah ktah ko hadooh kattæ kattæ wa wot ki bei ki pa leh da chem chitom bha ki u pynlai skur ya ki khon ki kti.
Neidaw ka Lockdown da em leh ki bei ki pa ki wym yohsa de wot wow pyndam skur ya ki khon wa joor duna i mih na ka kamai kajih, wei da hap wow pyrkhat leh ya ka baam ka dih, da em leh kiwa paan ram paan chah yow su ya ka bai Online Class wei ini leh da booh ko hei eh hadooh kattæ ya ki bei ki pa khamtam cha kitu kiwa em cha nongkyndong kiwa boon hi kiwa chkeh Mobile na kiwi.
Kamtæ ka seiñ da booh ko yei kyrpaad wa joor bha ya u Lahkmen Rymbui uwa pait ya ka chnat puræ puthi wow sñiawbha u wow chimkhia ya ini i kyrpaad yong ka seiñ wei wow ap u leh yei ood ki bei ki pa nadooh kiwa mylla sngi, kiwa chong yungwai khamtam leh ya kitu ki wym em bei em pa de.
Da booh leh yei kyrpaad deiwa kyntu leh ya ki tre skur wow sñiawbha ki u yai chah ya ini i eh wa chem ki bei ki pa yong ki khynnah. Da kdaw leh wa boon ki skur ki bru samen kiwa em hapoh ka District kiwa chkeh leh du na ka bai skur kamtæ ya ini leh da kyrpaad ya u Montri wow chimkhia u.