Shillong: Ka Khasi Students Union (KSU) seiñ-bei da paan pynche ko na u Chief Electoral Officer (CEO), u FR Kharkongor hajrong i thmu ka Election Commission ka jylla wow pynpsiah pyrtuid sa hadooh palat 1 Lak ngut kiwa chong chnong ha chwa ka Election.
Hawa yaklam wa kiwa pathai khubor, u General Secretary ka KSU, u Donald V. Thabah da ong u wa ka seiñ ym kwah ko wa ini i thmu ka Election Commission u e laad ko ya ki baar jylla wow yoh ki u pynpsiah pyrtuid kam kiwa thap Vote.
Da pyntip u leh wa ka seiñ da yaklam ko wow pait bniah bha yei rukom pynpsiah pyrtuid ya ki baar jylla kiwa da em 30 snem i rta, wei da kylli u deiwa ong, “Cheiwon won wiar ki waroh ini i por?.”
Hei yatoh won wa i thmu ki kattu katni ngut kiwa mihkhmat wow pynpsiah pyrtuid ya ki baar jylla, u Thabah da ong u, “Neiliang u CEO da ong u ha khmat ka seiñ, wa ki seiñ saiñ pyrthai wa kiwa mihkhmat ym ye ki u pynpsiah pyrtuid ya kiwon kiwon wei ym em bor ki leh wow tipmit ya kiwon ki bru wa ye u pynpsiah pyrtuid.”
U Thabah da ong u leh wa ka KSU da pynsñaiw ko hakhmat u CEO wa ym sñiaw yahaap lada ka Election Commission kheiñ ko yei boon bru katkam ka Census u snem 2011 neibhah ha ka Census ym em klam ko chaphang ki tre jylla tre chnong neibhah da em leh ki baar jylla wa wan kreh mylla kiwa ym em thaw sah wei ki leh da yoh EPIC ki ha kiwi ki jylla leh.
Da pyntip leh wa neiliang u CEO da ong wa i booh thong ka Election Commission wow pynpoi sa palat 1 Lak ngut kiwa thap Vote toh wow thap pyrtuid ya kiwa da dap 18 snem i rta khamtam kitu kiwa sah cha nongkyndong wa kiwa sah ha khappood ka jylla wa kiwi ki jylla kamjooh ka ri.
Discussion about this post