Paan pynche ka WHO naka China hadien wa yoh kjut ki khynnah khlem tip yei daw

Ka Word Health Organisation (WHO) da paan ko yei jubab wa janai naka China hadien wa em boon kiwa yoh kjut deiwa chitom u riñ mynsien (Pneumonia) ha ki khynnah.

Ka China ha ka 13 tarik uni u bnai wa ki heh ka National Health Commission da pyntip ki wa em kiwa yoh kjut chitom riñ mynsien (Respiratory Diseases) ha China tangwa ki bor sorkar da ong ki wa ini toh neidaw wa da pynduna ya ki kyndon yada COVID-19 wei deiwa emlang ka kjut synrum wa rah u khñiang Bacteria mycoplasma pneumonia uwa ktah khamtam ya ki khynnah, neitæ u Respiratory Syncytial Virus (RSV) wa u SARS-CoV-2 (uwa man u Virus wa wanrah ya u COVID-19). Kamtæ da emkaam donhi wow pynkhlan wow e sumaar.

Hadien ini haka 21 tarik uni u bnai da mih ki khubor heiwa ka ProMED kawa man kam chibynta ka International Society for Infectious Diseases da pyntip ki wa em boon syndet kiwa yoh kjut Pneumonia i wym tip i daw heiwa da dap ki Hospital da ki khynnah ha Beijing, Liaoning wa kiwi de ki thaw heiwa da hap wow khang ya ki skur. Ka ProMED da ong ko iwa phylla toh ka Beijing waka Liaoning man ki kiwa ya jngai kamwa 800 Km. Kiwa chitom ym em kyoh ki tangwa da iñ doh ki wei da sdang em wa mih wa ad ha ki sner.

Ha ka 22 tarik won, ka WHO da paan ko ya ki Epidemiologic wa Clinical Information kamjooh ka Test Result wa da yoh na kini ki khynnah wa chah ktah katkam ka International Health Regulation wei da paan leh wow khana bniah ki jait khñiang wa da sdang ya kini ki kjut.

Related posts

Sdang ka Woodland WK Hospital yei pynkha khon wa khlem kjut iwa nyngkong dooh hapoh ka West Jaiñtia Hills

March 22, 2025

Pynman ka Jowai City YMCA ya ka Health Camp neibynbta kiwa da heh rta

March 21, 2025

Nadooh chiteiñ u Naichiphaw, ha ki bynta ka North China da em boon kiwa yoh kjut wa joor ka synrum hawa nujor ha ki le snem wa da lai heiwa da phah wow chim tika wei wow yajngai ki na kiwi wei ka China leh da em ko ki laad ki luti wow booddien ya kini ki jait kjut wei da toh u pyntip ki cha ka Global Influenza Surveillance & Response System.

Ha ini i por wa ka WHO dang paan ko yeiwa emkaam u pyntip bniah cha ka, da ong ko yow kdoh u khoom ya ini i kjut, da pynchlur ko wow yada deiwa chim tika, u jngai na kiwa kjut, u neh hapoh yung manda kjut, u chong-ngiah, u phah Test, u deiñ Mask, wow wai ya ki dwar, ki khian-dwar wei wow sait bha yei kti.

Ya kani ka Wyrta naka WHO ye phi u puræ heini. Katwa kawa na ka ProMED ye phi u puræ heini.