U Montri Rangbah ka jylla, u Conrad Kongal Sangma da khana u wa da yaklam u wa u Montri ka sorkar pyrdi wa pait ya i chait i khiah wa kamjooh u Montri yong i kaam rep ka sorkar India wow kyntu ya ka sorkar wow e laad ya ki khynnah wa puræ ha Manipur wow puræ noh chwa ha ki thaw hikai kiwa em ha Meghalaya wa kiwi ki jylla ka thaaiñ North East.
Kam wow kdaw heini wa hadien wa mih i kulmar ha jylla Manipur nadooh ka 3 tarik u Naisan uni u snem, kiwa boon ki khynnah na ka jylla Meghalaya da hap uiñ ki neibhah wym ye de ki wow lai puræ cha Manipur neidaw i awri awra.
Neidaw i dooh ki khynnah u lai puræ neiliang u Conrad da yaklam u wa ki Montri ka sorkar India wow e laad noh chwa ya ki wow chah hikai noh ha kiwi ki thaw puræ wa kynthup ya ka Meghalaya neibynta chisnem.
U Conrad da pyntip u wa neiliang ka sorkar jylla da kyrpaad ko wow booh thaw puræ ya ki khynnah ka jylla kiwa puræ ha Regional Institute of Medical Sciences (RIMS), Imphal wa ha Central Agricultural University (CAU) wow yoh ki ya ki thaw puræ ha kiwi ki bynta ka jylla neibynta chi snem.
Da ong u wa neiliang ki Montri leh da yahaap yumut ki wa ini i tyrwa tangwa ya i rai ympu chim neidaw wa dang hap pynsñiaw ya ini ha u Montri ki kaam pohyung ka jylla.
Discussion about this post