U montri ka chnat Labour ka sorkar jylla, u Sanbor Shullai da yachem u ya u montri ka sorkar pyrdi wa pait ya ka Labour and Employment u Bhupendra Yadav ha ka 27 tarik ha nongbah New Delhi heiwa da ong u wa hanla em chiboon i eh i khoo wa i duna, ki paidbah ka jylla toh kiwa kreh chitom. Da ong u leh wa boon toh kiwa kreh ha ki kaam kiwa ympu biang ki seiñ wa pait wow pynlang ya ki namo ki Unorganized Sectors kam kiwa kreh yung bru, kiwa khih mylla, kiwa kamai Taxi, dai jhoor, dai soh wa kiwi kiwi.
Katkam ka rai ka Supreme Court ha ka 29 Naiynru, 2021 ka sorkar pyrdi lyngba ka chnat Labour & Employment da sdang ko ya ka National Data on Unorganized Workers (NDUW) kawa man ka website wow thap pynrtuid yow pyntipmit (Register) ki wakreh ha ki Unorganized Sector khnang wow yoh yarap na ka sorkar pyrdi.
Hajrong ini, u Sanbor da ong u leh wa ka chnat Labour ka Meghalaya daw leh ko katwa ye wow pynboon ya kiwa wan Register ha ka NDUW heiwa daw pynchlur ya ki wow yaleh Aadhar Card, wow wai Bank Account deiwa pynyabi lang (Link) wa u Mobile Number khnang wow suk kiwa leh Online Registration.
Chooh chooh da ong u wa daw pynsñiawthooh paidbah chaphang i yoh myntoi na ka JAM (Jan Dhan Yojana Bank Account), ka Aaadhar Card wa i pynyabi ya ki Mobile Number wa ki Bank Account iwa da sdang da ka sorkar India wow leh ya ka Direct Benefit Transfer (DBT) namo i phah poisa sak cha ki Bank Account.
Hajrong ini da kyrpaad u ya u montri ka sorkar pyrdi wow e yarap poisa kyrpang ya kiwa kreh mylla ha Meghalaya kiwa da Register ha ka NDUW i wow man kam ka dak sñiawngooh, i leh bha ya ki da ka Ministry kamjooh kam chibynta i lehkmen dap 50 snem ka Meghalaya.
