15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Paanmaap u Prestone wym pu su ka sorkar ya ka bai kari wa pynemkaam COVID Duty

Advertisement ad1

Shillong: U symbood montri rangbah ka jylla, u Prestone Tynsong da pynsñiaw u yei sñiawdiaw wow tip wa ki tre kari wa kiwa yah kari wa chah pynemkaam ha ka sorkar ym pu yoh ki yaka bainong yong ki.

U Prestone da paanmaap u na ki tre kari wa kamjooh na kiwa yah hajrong i wym ye u su ka sorkar ya ka bainong, kawa da pynman ya ki wow yachem ki yei eh. Da ong u wa neiliang yong oo ym em tip u hajrong i wym su yaka poisa, tangwa da yoo donhi u ha ki laad pathai khubor ya i ood yong ki.

U Prestone da kular u leh wa sorkar daw pynlait noh ko ya ka poisa neibynta kitai ki kari.

Ynne ka sngi kiwa yahkhmat ka Meghalaya Travellers and Transporters Association da lai ki wow kyntu ya u Prestone wa ka sorkar yow pynlait noh ya ka bainong ka yong ki.

Katkam wa pyntip u Aldin Kharshandi wa u John L Nonglait, kiwa em kari kiwa da pynemkaam da ka sorkar neibynta ka COVID duty hadooh ynne yn pu yoh tang chi naia leh, wei lada ka sorkar ym pynlait noh smat ya ka bainong yong ki, ym banse wow pynman da ka yakhih wow sangeh lai ya ki kaam ka sorkar.

Katkam wa pyntip ki dkhot ka Meghalaya Travellers and Transporters Association, nadooh wa sdang ym em i yakut neiliang ka sorkar ya i su, tangwa da yoh bait ya i phah na ka yung krehkaam yong ka Deputy Commissioner wa toh u lai yaka COVID Duty.

Da pyntip leh wa da em palat 70 tylli ki Bus wa palat 150 tylli ki Tourist Taxi kiwa da chah pynemkaam da ka sorkar nadooh u bnai Wisu (March) uni u snem, wei i wym su ka sorkar ya ka bainong da wanrah ko yei eh ya ki neibhah wa hap ki wow im deiwa chim ram.

Share this:
Previous

72 ngut kiwa dang yoh wa 73 ngut kiwa chait na u COVID-19 ha Meghalaya

Next

U chna bait da ka Shopping Mall ha Barik, ong u Prestone