Hadien wa kiwa saam khoo rachon ka Pamrakmai FPS Centre wa da chimkti u saam da ka Iahunlang VO, pynsñiaw ko yei eh neidaw wa duna kilo i yoh khoo rachon wa da pynlait na ka yung krehkaam u DC Supply East Jaiñtia Hills District wa em chiboon i wym hun wa i pynbaad na kiwa yoh myntoi khoo rachon pyrchah ya kiwa saam khoo rachon hajrong i wym biang kilo neibhah wa duna kilo i yoh khoo.
Kamtæ neiliang ka Vigilance Committee hei yahkmat u Secretary, u Wellson RD Siangshai uwa man leh kam u Secretary chnong, da pynsñiaw ki yeini i eh wa kiwa chong chnong chem ki ha u Deputy Commissioner ka East Jaiñtia Hills District deiwa kyrpaad wow chimkhia u tuklar hajrong ini i eh wa da ktah wei pyndoohnong ya kiwa baam khoo rachon yong ka chnong.
Neiliang u DC ynnin ka 22 tarik da phah u ya ka chnat wa toh u pait yeini wow lai thaw kilo ya u khoo wa da pynpoi ha kani ka FPS Centre khnang yow chem yei sakhiat.
Ha ini i wan thaw kilo ya u khoo rachon da emlang ka E.V. Pariat, Sub Inspector Supply Khliehriat, u H. Tyngkan, Office Assistant Supply Branch Khliehriat, ka Government Wholesaler, ka S. Bareh chirup wa ka Dealer namo kawa saam rachon wa ki dkhot ka Vigilance Committee yong ka chnong.
Ha ini i wan wow thaw kilo da chem ha man ki churia khoo heiwa ka Government Wholesaler da kheiñ ki wa u khoo da em u 49 næ 50 kilo tangwa da chem wa em du kamwa 42 kg, 40kg, 39 kg, 38 kg, 37 kg wa 36 kg donhi ha man chi churia khoo ymtoh katkam wa da toh u em.
Ha ka chi bnai ka Wholesaler da pynpoi ko 107 churia u khoo rachon yong kani ka chnong wei manda thaw kilo ya kawi pa kawi ka churia khoo da chem wa da poi 43 Quintal, 1 Kilo, 845 Grams na ka 53 Quintal, 68 Gram wa toh u pynpoi ha kani ka FPS Centre man-u-bnai.
Na itai i thaw kilo da chem yei duna kilo u khoo rachon da 10 Quintal, 66 Kilo, 155 Gram. Kamtæ ka Sub-Inspector Supply da phah ko ya kani ka Wholesaler wow wan pyndap ya uni u khoo wa duna wa da toh u poi ha kani ka thaw saam rachon.
Ka chnong Pamrakmai em ko 16 tylli ka Card AAY, 176 tylli ka Card PHH wa 24 tylli ki Card Non-NFSA.
Ini i duna kilo u khoo hadooh katni da ktah ko hadooh kattæ kattæ ya kani ka dukan saam rachon wow ye u pyntoh pynbiang cha kiwa yoh myntoi khoo rachon.
Kamtæ neiliang ka Vigilance Committee yong ka chnong da pynsñiaw ko yei sñiawngooh ya u Deputy Commissioner (Supply) East Jaiñtia Hills District uwa da smat u wow chimkhia wei wow ap yeini i eh wa kam ka chnong da chem ko heiwa neilang yong oo da pynsñiaw u wa daw leh yeiwa emkaam pyrchah ya ki Wholesaler heiyatoh wa ini.
Ka Vigilance Committee wa ka Dorbar Chnong Pamrakmai da kyrpaad wei kyntu ko ya ki bor sorkar wa toh u pait wow chimkhia wei wow thooh bniah heiyatoh wa ini yow lait ko u ktah wei dooh nong yei yoh khoo rachon.
Discussion about this post