U Montri Rangbah ka jylla, u Conrad K Sangma ynne hapoh ka yung dorbar da pyntip u wa ka sorkar da booh thong ko wow pynmih palat chi lak tylli ki kreh lyngba kiwa boon ki Scheme ka sorkar ha uni u chi snem wow wan.
U Conrad da pyntip u leh wa da dep pynmih 2.5 lak tylli ki kreh ha kini ki 3-4 snem.
Yeini da jubab u yeiwa kylli u MLA ka Nongstoiñ, u Gabriel Wahlang wa kammon leh ka sorkar yow pynduna yei dooh kreh ki bru hapoh ka jylla Meghalaya.
U Conrad da ong u wa lyngba ki Scheme wa ki Program sorkar da ye wow yarap pynyoh kreh wei wow seiñ khih lyngba ka PRIME, MGNREGS, CM-ELEVATE, FOCUS, FOCUS+, Skills Meghalaya, Meghalaya Grassroots Music Project wa kiwi kiwi de.
Da pyntip u leh wa ka Unemployment Rate ha Meghalaya man ko kamwa 3% katwa ka National Average toh 4.7%. Chooh chooh da ong u wa ka sorkar da booh tong ko wow pynmih hadooh 5.5 lak tylli ki kreh ha kini ki 5 snem wow wan.
Heiyatoh won i thung kreh ha ki chnat sorkar da pyntip u da dep thung kreh palat 500 ngut ki Doctor, da thung kreh leh ya kiwa man kam ki Nurse, kiwa sikai skur, ki pulit wa kiwi ki kreh Technical.
Hawa kylli yei thung kreh da ki District Selection Committee (DSC), u Conrad da ong ko wa da em i thut nadooh wa em ka khlam COVID-19 wei sa i pynkrehkaam yaka Roster System tangwa ka sorkar da pynbait ko yeini yow ye ki DSC u thung kreh deiwa laitlooid.
U Leader of Opposition, u Ronnie V Lyngdoh da paan pynche u yei yoh kreh ki bru ha ki yung krehkaam ki bru samen, ki karkhana wei kamjooh kiwa kreh mylla, heiwa u Conrad da ong u wa ka sorkar daw kynthup lang ko yei rep i riang hapoh ka i pynmih kreh neitæ ha ki kaam uiñke suwari wa kiwi kiwi de.
Heiyatoh won wa ki Engineer ki wym yoh kreh neidaw wym em ki jait kreh wa yatoh wa iwa lai puræ ki, u Conrad da ong u wa em hi kam ini wei ka sorkar u pyrchang ko wow pynmih ya kiwa boon ki jait kreh.
Discussion about this post