U Chief Electoral Officer ka jylla, u B.D.K Tiwari da ong u wa ya ki pyrtuid kiwa thap Vote kiwa da em ha ka Draft Electoral Roll daw pynmih paidbah noh nadooh mynstep ka sngi ka 27 tarik, wei neibynta wow ujor ya kiwon kiwon ki pyrtuid u sdang i nadooh mynstep hi ka sngi hadooh ka 9 tarik u Kmaichonglad (Dec) uni u snem, hadien itæ daw pynmih paidbah won ya ki pyrtuid wa pura namo ka Final Electoral Roll ha ka 5 tarik u Duyatra (Jan) 2024.
Hawa klam wa kiwa pathai khubor ynne ka sngi, u Tiwari da ong u wa ha ka Draft Electoral Roll i em kiwa thap Vote ha ka jylla man ki 21,86,151 ngut, iwa pynyoo wa i em kiwa thap Vote da ku i hadooh 21,178 ngut nadooh wa kut ka Election MLA uni u snem.
Da ong u wa napyrdi kiwa thap Vote thymme da em 10,81,006 ngut ki chynrang wei 11,05,142 ngut won ki kynthai, katwa 3 ngut toh kiwa da pynkylla yei man kynthai chynrang ki (Third Gender).
Neiliang u CEO da ong u wa da pynmih chooh chooh leh ya 32 tylli ki thaw thap Vote (Polling Station) kiwa thymme. Ki thaw thap Vote kiwa thymme ha EKH District em ki 8 tylli, ha WJH District 6 tylli, Ri-Bhoi 2 tylli, WGH District 6 tylli, WGH District 2 tylli, SGH District 4 tylli, EJH District 2 tylli katwa ka Eastern West Khasi Hills, South West Khasi Hills waka North Garo Hills District em mar kawi ki thaw thap Vote wa thymme.
Hawa kylli, u CEO da ong u wa i ku kiwa thap Vote ye wow man neidaw wa ha kani ka kynti da thap pyrtuid hadooh soo sien ha ka chi snem, wei da pynrap wa kani ympu man ko ka thup kawa pura neibhah ki bru dang ye ki wow ujor wei i thap pyrtuid thymme ya kiwa em hok leh daw pteiñ i.
Heiyatoh wa u yoh pyrtuid ki bru na baar ri, khamtam kiwa wan psiah tooh na Bangladesh, neiliang yong u CEO da klam che u wa ka chnat da chim ko waroh ki laad ki luti wow pyntikna wa kam kitæ ki bru ym yoh ki wow thap pyrtuid ha ka Elelectoral Roll.
Discussion about this post