Kam chibynta wow pynchlur ya waroh ha i puræ puthi, ynne ka sngi dei chimkhia u Montri ka chnat Puræ Puthi ka jylla uwa man leh u MLA ka Amlarem, u Lahkmen Rymbui da pynman ya i pynkup burom ya ki khynnah wa lehbha ha ki Exam yong ki ha ka yalang pynkup burom wa tip kam ka 7-Amlarem LA Constituency Academic Award Ceremony wa pynman ha pchem ka Enowell Hall, Amlarem.
Chibynta wow pynchlur wei wow man kam ki nongmuna ya ki khynnah, ha kani ka sngi da khut sñiawbha ya u Chief Secretary ka jylla, u Donald P Wahlang, u DGP ka jylla u Dr. LR Bishnoi, u Commissioner and Secretary ka chnat puræ puthi u Dr. BDR Tiwari, u SDPO ka Amlarem u Donkupar Moksha, ka SDO ka Amlarem ka YR Mawlong, u DSP ka East Jaiñtia u Jason Mairom wa kiwi kiwi.
U Dr. BDR Tiwari hawa e yei klam da yaroh u ya ki bru na ka thaaiñ kiwa man ki bru wa chimkhia wei kiwa kreh chitom bha.
Da ong u leh wa dap u dei mynsien wa sñiaw sarong wow kreh hapoh u Montri uwa chynna jngai ha ki kaam ki wow myntoi ym du ya ki paidbah ka thaaiñ tangwa ka jylla hi leh waroh kawi.
U Dr. LR Bishnoi hawa e yei klam da ong u wa kmen u wow tip wa ynne ka sngi da pynkup burom ya ki khynnah wa yoh palat 60% ha ki Exam yong ki wei da kyntu u ya ki wow pteiñ wow minot khnang wow poi ki cha ka thong i jop.
Da kyntu u leh ya ki khynnah wow man ki kiwa syndong wow kynmoo ya ki bei ki pa yong ki manda mih ki wow lai puræ chawi, wow man kiwa minot wei wow yait na i drugs.
Chooh chooh da sñiawkmen u wow tip wa ha ki le snem wa dadep ym em kawi wot leh ki kaam wa yatoh wa ki drugs hapoh ka thaaiñ heiwa da kyrmen u leh wow ye u pteiñ wow yait yei drugs sa ha ki por wow wan.
Neiliang u Donald P Wahlang hawa e yei klam da e khublei u ya kiwa sikai wa man ki ka bynta wa khroo bha heiwa ynne ka sngi da man ko kawa jop toh neidaw yong ki.
Da kyntu u leh ya ki manbei manpa wow pynclur ya ki khon wow lai puræ ki ymtoh wow ong ya ki dam u lai skur wow yang diah noh neibhah wa ki khynnah ye ki wow poi cha ki thong i jop wow wanrah leh yei burom hadien.
U Lahkmen Rymbui hawa e yei klam da ong u wa ini i pynkup burom ymtoh iwa kut tangwa chim wow man i kamwa sdang khnang wow lai sam chaphrang.
“Ham ong wa i dooh u man i i daw wow sangeh yei thooh yei stat tangwa e wa i thrang wow tip wow thooh yei stat u yah i ya ka luti,” da ong u Lahkmen.
Da ong u wa ha ka jylla boon ki khynnah katni ym em de u yang ki ya ki kreh sorkar tangwa da ye ki wow yieñ pyn hei kjat yong ki wei ini pynman i ya ki wow e kreh wot ya kiwi leh.
Chooh chooh da ong u wa boon kiwa wan na baar cha ka jylla Meghalaya toh wa yoo ki wa em ki kreh wei em ki laad kamai katwa kamtæ ymye wow ong wa ym em ki kreh katni.
Da kyntu u leh ya ki khynnah wow pteiñ ki yei thooh yei stat neibhah i stat ym kut i du ha ki kot tangwa emkaam wow pynlut por leh yei thooh yei stat lyngba ka Internet khnang wow man ki bru kiwa chemphang.
Heijooh i por da ong u wa katni em ki bru wow pynbaad wa pynkup burom ya ki khynnah katni toh wa da jan ka Election tangwa hajrong ini da ong u wa ki kaam yong oo u rap thai i neibhah ya i pynkup burom da pynman la le sien kattu.
Ha kani ka sngi da pynkup burom ya ki 300 tam ngut ki khynnah wei da pynkup burom leh da ka Special Award cha ki 14 ngut kiwa pait yei khooid i jngiar ha ka chnong Amlarem.
