Wow pynkhreh ya ki khynroo khyllood neibynta ka mynried, ka sorkar jyllla lyngba ka Sports & Youth Affairs Department ryngkat ka chnat puræ puthi da pynman ko ya ka ‘Aspire Meghalaya’ ha waroh 12 tylli ki District wa pynlai da ka AVENUES, Shillong. I thmu kani toh wow pynkhreh ya ki khynnah chwa wow yakhun kreh ki wei wow pynchlur ya ki wow sai yei sap yong ki khnang wow ye ki wow yoh myntoi na ki Scheme waphær waphær.
Heiyatoh wa ini da em 3182 ngut ki khynnah na ki 15 tylli ki skur ha ki District hapoh ka jylla da chah hikai ki ha ka Soft Skill Training wa ka Talent Identification Program lyngba ka Aspire Meghalaya.
U Montri Rangbah ka jylla, u Conrad K. Sangma da wai u ya ka Aspire Meghalaya ha u Wisu uni u snem kamwa pyrchang hapoh ka Meghalaya Youth Engagement and Training Programme. U Conrad da ong u, “Ka Aspire Meghalaya toh ka thong krehkaam wa kyrpang neibynta ki khynnah khynroo ka jylla yong i. Man ko ka rynsan kawa ye ki wow kitkhia wow chah hikai ha kiwa boon ki bynta, khnang wow man kiwa jop ha ka mynried mankawi.”
Chibynta na i thmu hi toh wow e laad ya ki khynnah wow pynsñiaw yeiwa angnood ki ha ka imlang sahlang, i puræ puthi wei khamtam heiyatoh wa ka mynried yong ki. Heiyatoh wa ini da pynman ya ka Meghalaya Youth Survey heiwa palat 50,000 ngut ki khynnah da chimbynta ki ha kani ka sorjamin yow sñiawthooh yeiwa angnood ki. Ki bynta wa ar yong ka Aspire kynthup i ya i e sikai ya ki khynnah ha ki skur ha ki Soft Skill lyngba ki Workshop wa e kam ha i sñiawskem (Confidence), rukom pyrkhat che ya ka mynried (Clarity), ka rukom pynyatoh wei klam ya kiwi ki bru (Communication) wei i ye wow lai chaphrang (Emotional Resilience).
U Sameki Syngkon, uwa chong ha ka Class 12 hapoh ka skur Ummulong Presbyterian Higher Secondary School, da e mynsien u ya ki para khynnah deiwa ong, “Waroh man i kiwa stat wei em i jar ki sap, tangwa kam ki khynnah boonsien sarom wei tieñ i wow pynyoo ya ki. Ngait O wa waroh i kiwa da chah hikai lyngba ka Aspire Meghalaya da yoh myntoi i chiboon. Tæ kyrpaad O ya waroh wow pyndooh ya i sarom deiwa pynyoo ya ki sap kiwa em ha i. Hawa kiwa sikai khut ki ya i, ymtoh u artatien i, tangwa toh u mih i chaphrang dei mynsien wa chlur.”
Ha i klam ha kawi ka Graduation Program, u Salanbor Kamar, SSA Office, da yaroh u yei kreh chitom kiwa pynlai ya ka Avenues. Da pynchlur u ya ki khynnah deiwa ong, “Ya kani ka program, da pynkhreh kyrpang neibynta yong phi, wow yarap ya phi wow sñiawthooh wei tip che ya ki sap wa i thmu wa em ha phi, wei emkaam wow jied ya ki luti kamai jakpoh wa biang tam neibynta ka mynried samen.” Da ban u leh yei smat ki District Sports Office hapoh ka Sports & Youth Affairs Department, wow yarap e mynsien wei wow kdaw luti, khamtam ya kiwa thrang wow pynjanai pynchkeh pyn yaki hi ha ki liang ki Sports, deiwa kyrmen wa ka jylla u yoo ko boon ngut kiwa mihkhmat ha ki rynsan waphær waphær hapoh ka ri India wa ka pyrthai leh kamjooh.
Ki 15 tylli ki skur kiwa da pyndep ya ka e sikai ka Aspire Meghalaya hadooh kani ka sngi kynthup ki ya ka Government Girls’ Higher Secondary School, Shillong (East Khasi Hills); Williamnagar Government Higher Secondary School wa Green Yard Higher Secondary School (East Garo Hills); Baghmara Government Higher Secondary School (South Garo Hills); Seiñjat Tuber Higher Secondary School, Khliehriat Higher Secondary School wa Ambrose Memorial Secondary School (East Jaiñtia Hills); Government Girls Higher Secondary School, Ummulong Presbyterian Higher Secondary School, Sawlyngdoh Higher Secondary School wa St. Dominic Higher Secondary School (West Jaiñtia Hills); Nirupama Memorial Secondary School, Rangsakona Higher Secondary School, Ampati Government Higher Secondary School wa St. Claret Higher Secondary School (South West Garo Hills).
Ye leh wow ong wa ka Aspire Meghalaya thmu ko wow lai e sikai cha ki palat 60 tylli ki skur hapoh ka jylla wei wow e sikai ya ki palat 10,000 ngut ki khynnah hapoh uni u snem.
