Ka Supreme Court da pynmih ko ya ka hukum wow pynsangeh chwa ya i kem wei kset ya ki ksaw sarok ha Delhi-NCR deiwa ong wa ki ksaw chisien wa da kem toh u e dawai tika (Vaccinate) wei dawai wieh wei wow pynlait biang ki cha i thaw wa rah ya ki.
Ka Supreme Court da pynkylla ko ya ka hukum chwa yong ka Bench wa ar ngut ki Judge heiwa nyngkong ka hukum da man ko kawa khor neibhah emkaam u kem wei kset ya ki ksaw sarok wei neitæ won u pynchitom ya kiwa pynthut yeini.
Ka Bench ki le ngut ki Judge wa kynthup ya ki Justice Vikram Nath, Sandeep Mehta wa NV Anjaria hawa bichaar ya ka mukotduma ynne da ong wa ki ksaw wa rap dakait kiwa myllien u dait bru wei kiwa em Rabies toh u e dawai ya ki wei wow kset ki. Da phah leh wow booh ki thaw wow e baam ya ki ksaw.
U Justice Vikram Nath chooh chooh da ong u wa kam kini ki kaam toh u phah cha kani ka yung bichaar khnang wow pynmih ya ka National Policy hadien i pynkylla ki kattu katni ki bynta.
Ka hukum wa nyngkong da wanrah i yei chrai hapyrdi kiwa boon kiwa maya ksaw wei ha ka 14 tarik uni u bnai da chong bichaar biang da ka Bench wa em le ngut ki Judge heiwa da pynmih ya ka hukum ynne ka sngi.
U muktiar ka sorkar Delhi, u Solicitor General, Tushar Mehta da kdaw u wa ha India em 37.15 lak sien i chah dait ksaw du ha u 2024 iwa man kamwa 10,000 sien chi sngi. Da kdaw u wa ka World Health Organisation da em yukheiñ ko wa em 305 ngut kiwa yap nei chah dait ksaw ha u 2024.
Discussion about this post