Palat 40 ngut u pynyaleh ka NCP ha ka Election MLA yong uni u snem

Shillong: U General Secretary ka Nationalist Congress Party (NCP) u Praful Patel da pynbna u wa ka NCP daw pynyakhun ko palat 40 ngut ki kyrtong ha kani ka MLA Election wow wan ha Meghalaya.

Hawa klam u wa ki laad pathai khubor ha i yachem u wa kiwa yahkhmat ka Pary ha Shillong, u Patel da ong u wa ka NCP daw pynyieñ ko 22 ngut na Garo Hills wei kamwa 20 ngut na ri-loom Khasi wa Jaiñtia Hills.

Katkam i ong u Patel, ka NCP ym kwah ko wow krehlang wa ka Congress ha kani ka jylla Meghalaya neibhah wa da kheiñ beiñ ko ya ka Party ha kani ka jylla neibhah ym em e chuki Montri hanlada kyrchaan ko ya ka sorkar wa yahkhmat ka Congress ha kani ka jylla.

U Patel da pyntip u wa dadep yaklam u wa kiwa yahkhmat ka AICC wow e chuki montri ya ka NCP ha ka sorkar u Dr. Mukul Sangma tangwa ym bien ki u burom, da ong u wa ka NCP ym toh u chah pynbaad ko hanlada em ko ha ka Sorkar neibhah em yoh ko ya ka kyrdan montri lait noh tang ka kam u Deputy Speaker wa du chipor donhi.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

U Patel da kynthah u leh ya ka BJP wa man ko ka seiñ wa wanrah yei tympiah hapyrdi ka jaitbru deiwa pynchit niam ko wei da pynrap u wa ka NCP daw yakhun ko ya kani ka Election da i sniawthooh yumut lang wa ki seiñ ri-loom kiwa em ha ka jylla.

Ka NCP da dooh ko ya ki ar ngut ki MLA warim hadien wa u Sanbor Shullai da mih u wow psiah cha ka BJP wa u Marthon Sangma uwa thmu wow psiah noh cha ka Congress.

Ha i jooh i por u Patel da beiñ u ya ka Congress deiwa pynbaad wa ka toh ka daw wa sahdien ka Meghalaya wei ka BJP won ym ye ko u pynum ya u dohnood yong ki paidbah ka jylla na ki kaam wa leh pyrchah ko.

Da ong u leh wa ka NPP em ko ha u jooh u laiñ wa ka BJP neibhah emlang ko ha ka NDA wa yahkhmat ka BJP wei toh u jubab ko ya ki paidbah.

U Patel da pynsñiaw u yei kyrmen wa ki paidbah ka jylla u e ki i chaniah cha ka NCP hapoh i yahkhmat u President wa thymme u Saleng A Sangma ha kani ka kynti.

Ha kani ka sngi ka NCP da pynbna ko leh ya ka thup wa nyngkong yong ki kyrtong wow yakhun ya ka Election.

Ki kyrtong wa da pynbna ynne ka sngi em ki 6 ngut wa kynthup ya u Tyngshain Lapang na Mawhati, u John D Sangma na Ranikor, u Ronaldon Dkhar na Nongthymmai, u Andrew Charles Gare na Mawshynrut wa u Predecessor Rumnong na Pynthorumkhrah.

U General Secretary ka NCP u Praful Patel u da pyntip u wa ka thup wa ar yong ki kyrtong daw pynbna ha kini ki sngi wow wan.

Chwa ini waroh, u Patel da wai u leh ya u moo-yurim wow chna ya ka yungkrehkaam ka Party ha Biver Road hei synran lang wa ki heh wa kiwa kitkaam ka Party.