Shilong: Ka chnat i chait i khiah jong ka jylla kam chibynta wow yada nei poor u khñiang COVID-19 (Coronavirus) da booh ko ya ki 70 ngut ki bru kiwa na kani ka jylla kiwa wan na kiwi won ki ri ha ki thaw chong kset næ Isolation wei napyrdi kini palat 60 ngut da pyllait noh hadien wa chem wa ym em ki kiwon kiwon ki dak ki chin wa chah ktah ki ha u khñiang COVID-19.
Hawa klam wa ki laad pathai khubor, u Commissioner & Secretary ka Health and Family Welfare ka sorkar jylla, u Sampath Kumar (IAS) da pyntip u wa em 70 ngut ki bru yong kani ka jylla kiwa sah cha baar ri wa kiwi ki jylla ka ri India kiwa da wan uiñ biang, wei neiliang ka chnat i chait i khiah da paitbniah ko ya i man i chait i khiah yong kini ki bru deiwa booh yaki ha ki thaw wa kyrpang neibynta 28 sngi, wei da pyllait ya palat 60 ngut na ki hadien wa chem wa ym em chah ktah, katwa ya kiwi dang booh ha i pait yaki yow pyndep hadooh 28 sngi.
Neiliang ka chnat i chait i khiah da kyntu ya kiwi leh kiwa wan na ki thaw wa chah ktah ha uni u khñiang wow man ki kiwa syndong pyndaki yaki hi hadooh 14 sngi neibhah wa ki dak ki chin pynyoo ki hadien 14 sngi.
U Kumar da ong u wa ki paidbah ye ki wow Phone ha u Number 108 neibynta wow yoh yutip wa rap bha hajrong ini i kjut, wei wow pyntip leh cha ka sorkar kawa de sikai wa kyrpang leh ya ki Doctor wa ki wakreh ha ki thaw sumaar ha ka jylla wow yakhun pyrchah ya ini i kjut.
Da ong u wa ka sorkar jylla da phah ko yaki Hotel wow pyntip ki lada em ki bru thymme kiwa wan cha kani ka jylla wei kamjooh da phah ya ki Hospital waroh wow booh yaka OPD du neibynta kiwa chitom wow riñ wei pynhiar mynsien.
Discussion about this post