Ka Green Valley Cement Ltd kawi naka karkhana pynmih khyndaw-bilat wa em ha East Jaiñtia ynne da e yarap ko da ka poisa Rs. 2,21,00 cha ka Ephatha Society kawa man ka seiñ kawa pait wa kdup yaki bru wa man kyrpang (Persons With Special Needs) neibynta i thmu wow chna yaka chlem e sikai wa tip kam ka Special Training Centre.
Ha kani ka sngi da yoh u pynman yaka yalang wa tbian kawa da pynlai da u Vice President ka Ephatha Society, u Heipor Uni Bang ha i thaw wa da e sñiawbha da ka Patty Phawa iwa heh kamwa 20,000 sqft wa em ha Dkhiah West.
U Pawan Joshi uwa man leh u Vice President ka Green Valley Cement ha i klam yong oo da ong u wa ka Green Valley sñiawkmen ko u yarap ya kam kani ka Society kawa da kreh chitom neibynta u yarap u kyrchaan, u kdup yaki bru kiwa chem chitom sakhiat ha i rukom im wa man-ka-sngi yong ki, da e khublei kyrpang u leh ya u President ka Society uwa da e kti na mynsien neibynta u chakri yaki bru kiwa kyrpang.
Da ong u wa lym toh sakhiat u Blai wa klam wa e bor ya u President, ym ye u kreh ya kani ka kaam kawa eh. Da ong chooh chooh u wa kani toh i sdang donhi u yarap wei yooluti u wa haki sngi wow wan daw krehlang u waka Ephatha Society ha kiwa boon ki bynta.
Neiliang ka Ephatha Society da e khublei ko ya u Hamlen Rymbai u waheh wa pawkhmat ka East Jaiñtia uwa da yahluti yaka Society wow lai thooh yarap na kani ka karkhana kamjooh uwa da jooh e yarap leh yaka Society, da e khublei kyrpang leh ya u Pawan Joshi uwa da smat wow yaklam waka karkhana kat hadooh wada yoh ko u e yarap cha ka Society.
Ha kani ka sngi da emlang leh ki khynnah wa duna ha i doh i pran, u President, Finance Secretary, Statistician, ki dkhot ka Ephatha Society, ki bru na ka Green Valley, ki khynnah wa chah hikai haka Ephatha Inclusive Vocational Training Centre kamjooh u Balen Thubru uwa man u President ka Jaiñtia Hills Truck Owner Association.
Discussion about this post