theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

Palat T. 2 klur da pynlut ka sorkar neibynta ka lieñsuiñ wa lai na Shillong cha Delhi

Advertisement ad1

Ka sorkar Meghalaya da dep pynlut ko T. 2,05,82,000 yow su cha ka Fly Big kawa pynlai ya ka lieñsuiñ na Shillong cha Delhi, da pyntip u Montri ka chnat Transport ka jylla, u Dasakhiatbha Lamare ynne ka sngi hapoh ka yung dorbar hadien wa kylli u MLA ka Shillong West, u Mohendro Rapsang.

U Montri da pyntip u wa ka Fly Big ym em de pynlai ki ya kani ka lieñsuiñ katni hadien 16 sien wa da lai ko wei neiliang ka sorkar da phah ko ya ka Show Cause Notice cha ka Fly Big hajrong ini wei da paan por ki hadooh wa kut uni u bnai.

Hawa kylli chooh chooh, da pyntip u wa ka Fly Big ym em ko da ka yong ka hi ka lieñsuiñ tangwa da chim wai ko da ka yong ka Spice Jet kawa tip kam ka Bombardier Q400 deiwa ong leh wa ini da man ko kam ka pyrchang nyngkong ka sorkar wow pynbiang lieñsuiñ cha Delhi i thaw wa emkaam ki bru deiwa pynrap wa yaka sorkular toh kawa da soi jhan.

Ha ini i por u Montri Rangbah ka jylla, u Conrad Sangma da yieñ u wow pynche wa hawa leh yeini da dep wow khut Tender heiwa da em ar liang kiwa thap Tender heiwa kawi da chong dor syad ware ko neibhah da thmu ki wow pynemkaam da ki lieñsuiñ wa heh kiwa ym ye wow hiar ha Umroi Airport.

Da pynche u leh yei daw wa da hap wow sangeh yei lai kani ka lieñsuin toh wa wan ka khlam COVID-19 heiwa ya kani ka lieñsuiñ da sdang ha u Kmaichonglad (Dec), 2020 heiwa hadien ini da khang yei lai i wan ki bru nadooh ki Engineer wa emkaam u pait ya ka lieñsuiñ.

U Montri da pynche u leh wa katni ki lieñsuiñ wa hær cha kiwi ki thaw lait noh na Delhi dang pteiñ hi ki kiwa da leh hapoh ka UDAN Scheme wei ya kini ki lieñsuiñ da su da ka sorkar pyrdi katwa kawa hær cha Delhi toh kawa su da ka sorkar jylla.

Neiliang u Conrad da pynche u wa hapoh ka UDAN i jngai wa ye ki lieñsuiñ u lai toh hapoh 500 Km wei ka sorkar jylla da pynkrehkaam ko yaka lieñsuiñ wa lai cha Delhi toh deiwa booh dor ka sorkar jylla wym toh u tam T. 5000 chisien lai wei yeiwa tam won i dor ka Ticket da pyndap da ka sorkar yow su cha ka Fly Big.

Neiliang u MLA ka Mawsynram, u HM Shangpliang da ong u wa ini iwa da pyrchang ka sorkar toh iwa da rem heiwa da su ko T. 12,86,371 chisien lai kani ka lieñsuiñ heiwa da kylli won u katwon ngut ki bru wa lai luti ha kini ki 16 sien heiwa u Montri da jubab u wa ym em u ka yukheiñ wa oo kattæ.

U Montri da ong u nadooh wym em de pynlai ya kani ka lieñsuiñ, ka sorkar leh ym em de su ko wei u e por ya ka Fly Big hadooh wa kut uni u bnai wei lada ym ye ki u pteiñ daw pait won cha kiwi wei daw chim ya ka rai wa kammon u leh.

Heiyatoh won wow hær cha kiwi ki ri wa cha jan, da pyntip u wa da em i yaklam tangwa ym pu em iyi iyi wa leh heiwa neiliang u Conrad da pyntip u wa daw emkaam wow pynkylla ya ka Umroi Airport kam ka International Airport wei daw hap pynheh ya ka lane deiwa thooh thaw da iwi yow chna noh da ka Airport wa thymme yow ye u lai kam cha Sylhet wa cha Dhaka iwa daw yarap ya ka khayi pateiñ.

Share this:
Previous

Evolution of the Khasi Students’ Union

Next

Ym chah wow dai kiad hapoh ka chnong Barato nadooh ka 17 hadooh ka 20 tarik