U MLA ka Jowai, u Wailadmiki Shylla ynne ha ka yalang booh mooyurim yow chna pynthymme ya ka yung krehkaam ka Thadlaskein C&RD Block deilang waka Hospitality Complex ha Thadlaskein; wa da pynman ha rood ka nan Thadlaskeiñ, da ong u wa kam uwa mihkhmat uwa da yoh wow kreh du ha ki le snem neidaw wa pynthut ka khlam, da ye u wow wanrah ya ki kreh wa da palat T. 450 klur hapoh ka Constituency.
Da ong u wa hadien wa chimkti u kam u MLA da booddien u ya ki kreh kiwa dang sahteiñ kiwa ki mihkhmat warim ym ye ki u pyndep kam ka Mynngot Water Supply Scheme kawa da sah da ki phaw phaw snem heiwa ha kini ki bnai wadep da ye wow pyndep ya ka wei ka chnong Jowai da yoh ko ya ka um wa khooid wa jngiar.
Ya ka Maternity & Children Hospital wa em ha Jowai kawa da sahteiñ, katni da dep ya ka wei da toh u wai noh tangwa neidaw wa em ka khlam da hap pynman ya ka kam ka COVID Hospital tangwa hei yong sakhiat nadooh ki wareh toh kiwa da dep thung wei ki kor leh da dep pyndait wei da yooluti u wa ha kini ki tayaw wow wan daw yoh noh wow wai ya ka.
Ka yingkieñ wa em hadien wa Thomas Jones Synod College kawa da sahteiñ da boon snem daw pyndep noh ka kawa da sahteiñ neidaw wym ya sñiawthooh yumut hapyrdi ka PWD wa ki tre thaw.
Heiyatoh waka Iawmusiang Market Complex, da ong u wa da wan yah ya u Montri Rangbah wow pait ya ka, wei hadien ini da rai wow pynlut daka poisa ka sorkar jylla wow chna pyndep ya ka heiwa oo kam u MLA da lai booddien u wow pynlait ya ka bai kreh namo ka Bill u Contractor kawa sah kamwa T. 70-75 lak yow sdang biang u kreh heiwa hadien wa pynlait yeini da sdang biang i kreh.
Tangwa syndet syndet uni u Contractor da dam u yei kreh wei da phah kot cha oo da boonsien yow pteiñ biang yei kreh wot hadien wa da dep pynbiang yeiwa kwah u, tangwa neidaw wym bien u sdang yei kreh da pyndam noh ya oo wei da khut Tender noh da iwi tangwa uni u Contractor da lai u cha ka High Court yow yaleh pyrchah yeini neidaw wa chah pyndam wei katni dang yaleh wow pynkut noh ya kani ka mukotduma wei da kwah wow pyndep noh u chna ya kani ka yaaw neibhah ka poisa wow chna toh kawa da em.
Da khana u leh ya kiwi ki kreh wa da yoh kam kani ka Thadlaskein Hopitality Complex kawa T. 35 klur, ka Smart Road Project kawa naka World Bank yow chna pynmiat ya ki sarok ha ka chnong Jowai neibynta 33 Km da yoh T. 25 klur wei da dep khut Tender wei da sdang yei kreh. Ka Demthring-Sohmynting-Moodymmai Road kawa 23 Km yow chna pynmiat pynheh kam u sarokbah uwa da jan dep pynchna katni hei lut wa T. 44 klur.
Da kdaw u leh ya u sarok NH 44(E) nadooh na Treiongriang uwa da sih bha uwa da pynthut leh ya kiwa uiñke suwari da dep pynchna hei dor wa T. 45 klur. U sarok Jowai Bypass uwa na Khliehtyrshi cha Treiongriang da dep yoh poisa naka sorkar pyrdi T. 97 klur heiwa da dep khut Tender biang deiwi hadien wa em i thut ini wa dep wei i kreh u sdang biang i yow pynkyllooid ya ka chnong Jowai.
Ya u Jowai Bypass nadooh na Thadlaskein cha Soomer da dep khut ya ka Tender kawa T. 14 klur yow pynchna noh ya oo.
Da dep pynyoh T. 6 klur ya ka Seiñriaj Jowai yow pynbha ya ka Aitnar. Ya ka Mini Secretariat ha Jowai da pynlait ka poisa kawa T. 20 klur (First Phase) kawa daw booh mooyurim u Montri Rangbah ha ka 1 tarik u Kmaichonglad (Dec) yow pynsuk ya kiwa chong chnong ka Jowai neidaw wa katni ka yung krehkaam u DC em ko hapyrdi ka chnong hadooh tang i thaw pynyieñ kari leh wym biang.
Da dep leh u pynchna ya u sarok deilang waka Footpath na Mukhla cha Mukhla Nongrim wa ki sarok chnong wa da pynlut T. 8 klur.
Neibynta wow pynmiat ya ka chnong Jowai deiwa booh ya ki Street Light, i chna Foot Path, i kær railing, u chna ya ki Open Air Gym, ki Park wa kiwi de, da yoh ya ka poisa kawa T. 12 klur hapoh ka Beautification of Jowai Town.
Da chna pynheh ya ka Circuit House, da dep chna ya ka Examination Hall ka Jowai Public School kawa da mut wow dooh wow pynman Exam hadooh wa da mut u lai ki khynnah cha Shillong yow thoh Exam neidaw wym biang ka Examination Hall.
Da ong u leh wa lyngba ka sorkar wa katni ya ka Kiang Nangbah Government College leh da dep yoh ko yei tipmit naka NAAC, ka Thomas Jones Synod College da tipmit hapoh ka People’s College Scheme. Da chna leh yow pynheh ya ka yung ksur ka Government Boys’ HS School wei da khut Tender leh neibynta ka Government Girls’ HS School ha kini ki sngi wow wan wei ya kini i lut dapoi i T. 5 klur.
Ya ka chnong Mihmyntdu da dep pynyoh ya u sarok wa T. 5 klur.
Ya ka Jowai Municipal Board leh da ye wow pynyoh poisa hadooh wa da thied ya ki kari kit jhep, ka kari tylliat jhep deilang waka JCB wei wow e kreh cha ki dong ka Jowai iwa ym duna waroh ini T. 10-15 klur.
Da ong u leh wa ka Jowai katni deiwa booddien u wei deiwa rukom kreh ka sorkar wa katni da yoh ko T. 1 klur tam chi snem wei hadooh katni da yoh T. 5-6 klur naka Urban Department neibynta iwa emkaam hapoh ka chnong Jowai.
Heiyatoh waka JJM da ong u wa da em ki chnong wym toh u yoh ka leh da yoh kam ka chnong Mihmyntdu kawa yoh T. 32 klur, ka Khliehtyrshi da yoh ko T. 24 klur kamjooh ka chnong Mookswan da yoh ko T. 5 klur.
Da ong u wa kawa emkaam bha toh wa da yoh wow chna thymme noh ya ka yung krehkaam ka Thadlaskein C&RD Block kawa T. 3 klur.
Kamtæ da ong u wa kini waroh da poi ki ym duna ya T. 450 klur hadooh T. 500 klur kiwa du ha ki le snem, wei hajrong kini da kyrpaad u wow e biang ki paidbah yei kyrchaan ya oo.
