U MLA ka Mawsynram u HM Shangpliang, ynne ka sngi hapoh ka yung dorbar chna aiñ ka jylla da wanrah u yaka ‘Zero Hour Notice’ hajrong ka phang wa ym ya ryngkat ka tulop kiwa sikai SSA wa kiwi kiwa sikai sorkar deiwa ong leh wa ym toh wow pynyaphær kyrdan ya kiwa sikai.
Da ong u wa ha kini ki snem wa da dep, ki 5814 ngut kiwa sikai ha ki LP School wa 6727 ngut kiwa sikai ha ki UP School hapoh ka SSA kiwa em hapoh ka jylla da pynman yakhih ki yow pynsñiaw yaka sorkar yeiwa chem chitom ki iwa hadooh katni ym pu ye wow pynbait.
Ka seiñ kini kiwa sikai da dawa ki wow kyrriah noh ya ki 12,541 ngut kiwa man katni kam kiwa sikai ka SSA yow man noh ki kam ki wakreh ka chnat puræ puthi ka jylla.
Da ong u leh wa katkam ka aiñ Right To Education Act da ong wa kiwa sikai wa da yoh kreh hapoh kani ka aiñ toh u yoh tulop ki kawa ryngkat wa kiwi kiwa sikai, tangwa da ong u wa hapoh ka jylla yong i won, kiwa sikai SSA da yabhah yaki na kiwi won ki nongsikai heiwa kani ka jooh ka aiñ yong ka jylla da ong ko leh wa toh wow booh kiwa sikai kiwa man kam ki wakreh wa pura wei kamjooh hapoh ki kyndon ka SSA leh da ong wa toh u em iwi donhi i kyrdan kiwa sikai ym toh wow yabhah boon jait.
Kamtæ da ong u wa hapoh ka jylla won ya kini kiwa sikai da thung kreh bait ya ki da ka Contractual Basis.
Neiliang u Montri wa pait yaka chnat puræ puthi u Lahkmen Rymbui da jubab u deiwa ong wa katkam ki kyndon, ka sorkar pyrdi u yarap poisa ko neibynta ka SSA iwa chong heiwa em poisa ko wei ka sorkar jylla dang pyrkhat ko kammon wow leh yow pynku tulop ya ki.
Da ong u leh wa boon ki skur SSA toh kiwa pait da ki School Managing Committee wei i thung kreh leh toh iwa leh da ka Managing Committee hi wei manda thung nongsikai toh u pait katwon boon ki khynnah (Student to Teacher Ratio).
Chooh chooh da ong u hapoh Meghalaya da em boon ware ki skur palat ya iwa booh kyndon hapoh ka RTE heiwa da phah leh yaka jylla wow pyndam ya kattu katni ki skur wei lada leh ya ini deiwa pait katwon ngut em ki khynnah wei katwon ngut emkaam nongsikai, boon kiwa sikai daw dooh kreh ki.
Da ong u leh wa sa iwi i eh lada chim ka sorkar ya waroh kini kiwa sikai, daw emkaam ym duna ya T. 567.644 klur chi snem yow ye u leh ya ini yow su tulop kiwa sikai SSA. Wei hap leh wow pyrkhat ya kiwi ki nongsikai kam ki Adhoc, Deficit, Pattern Deficit kamtæ da hap wow pyrkhat leh yei bhalang ya yaroh wei ym ye u pyrkhat du ya ki wi donhi. Kamtæ ka sorkar dang pyrkhat ko kammon wow leh ya ini wei ym toh iwa suk wow chim ya i rai wei daw poi i por wa hap u chim ya i rai kawa ye u man kawa ym waroh wow kmen yei rai tangwa hap leh wow pyrkhat yei myntoi ki khynnah kamjooh yaka puræ puthi hi waroh kawi.
