Ki dkhot ka KAM Meghalaya kawa man kam ka rynsan ya ki kyrtong wow yaleh Election kawa da pynyieñ leh ya le ngut ki kyrtong neibynta kani ka Election MLA 2023, kam chibynta wow pynyoo yei khooid hajrong i lut i sep hei lai yalap Election ki nadooh u April hadooh December 2022 da pynyoo ki katwon wa da noh kyllooid ki paidbah deiwa e yukheiñ kammon da pynlut ya kani ka poisa.
Ka KAM Meghalaya toh kawa da yaleh Election hajrong ka yurim deiwa pynemkaam da ka poisa wa da e sñiawbha ki paidbah heiwa da ong ki leh kiwi ki kyrtong toh u pynyoo ki neiwon yoh poisa ki wow yaleh Election.
Ki le ngut ki kyrtong ka KAM Meghalaya wa kynthup ya ka Angela Rangad na South Shillong, u Kyrsoibor Pyrtuh na North Shillong wa ka Wanpynhun Kharsyntiew na East Shillong wei hawa yaklam wa kiwa thoh khubor da ong ki wa hadooh katni ki paidbah da e sñiawbha ki T. 9,26,636. Wei na kani ka T. 9 lak tam ka poisa kamwa T. 4,36,200 toh kawa da e sñiawbha da ki bru napoh ka jylla Meghalaya hi iwa da man 47% na waroh ka poisa.
Da pyntip ki leh wa i e sñiawbha ki bru da em ki nadooh T. 200 hadooh T. 1 lak wei em leh kiwa e da i dud, ka slacha, u khoo wa kiwi de kam kini ki jait.
“Nadooh ka sngi wa ka KAM Meghalaya da rai ko wow mih madan wow yakhun ha ka Election 2023, da lai cha kiwa chong chnong yong ka jylla wa ki Constituency yow tyrwa ya ki kyrtong kiwa yieñ ha ka yurim yong i hok wa i sakhiat wei kiwa krehkaam deiwa che wei deiwa e yukheiñ,” da ong ki kyrtong ka KAM.
Da khana ki leh wa ha ki 7 bnai da ye ki wow psiah ha ki thlu yung wow yaklam markhmat wa ki para chong chnong yow ap yeiwa yoh ki u ong wei iyi iwa ha ki sñiaw ki iwa emkaam wei iwa chon bha yei sñiaw yong ki.
Da chem ki wa 95% kiwa chong chnong angnood ki wow yoh ya ki MLA kiwa ye u chna aiñ wa ki Policy neibynta wow kyntu wei pynbha yei rukom im kiwa chong chnong.
Palat 90% kiwa chong chnong kwah ki wow dawa wa ki MLA toh u kreh hok ki dei wym baamsap kiwa smat wow yachem wa ki yow yaklam yeiwa eh ki khlem da leh chiliang khmat.
Kamwa 50% won kiwa chong chnong pynsñiaw ki wa kwah ki wow yoh ya ki MLA kiwa im dei hok wei kiwa jooh kreh neibynta i bha i miat yong ki paidbah wa chong chnong.
