Ka National People’s Party (NPP) ka 7 Amlarem Block ynne ka sngi da pynman ko ya ka yalang pdiang burom ya u R.L. Tariang deilang wa kiwi won ki dkhot thymme wada wan psiah cha ka NPP neibynta wow e i kyrchaan wa pura ya u kyrtong NPP u Stephanson Mukhim u wow yakhun ha u 2023 naka Amlarem Constituency.
Yaka yalang pdiang burom da pynman ha Hall ka Syiem Jingsuk Amlarem wei da wan pynskem da u District President ka NPP West Jaiñtia Hills, u Wailadmiki Shylla uwa man leh u MLA ka 2-Jowai Constituency hei emlang u Stephanson Mukhim, ki MDC ka JHADC wa kynthup ya u Het Pohthmi, u Holando Lamin, u Saron Paswet, u Otomewot Lamin wa kiwi najrong ki paidbah wa boon.
U Portanri Pakynteiñ wa u Reaching Khongwang kiwa jooh kyrchaan ya u Lahkmen Rymbui hawa klam ha kani ka sngi khana ki yei daw wa yut ki na u Lahkmen toh wa i rukom krehkaam yong oo wym yahaap ki wa u paidbah wa dooh wa duk ka thaaiñ, deiwa wyrchaw wa u Stephanson Mukhim toh u bru wa jan cha ki paidbah wei ap u yei eh i khoo yong ki.
E kyrmen haroh ki ya ki paidbah wa lyngba i wan kyrchaan u R.L. Tariang uwa man kam u MLA warim, wa waroh ki MDC ka thaaiñ Amlarem, i jop ha kani ka kynti u lai ko cha u Stephanson Mukhim.
“Hanla u Lahkmen toh uwa ksoh ya ka chuki wa heh hapoh ka jylla wa kynthup nadooh ka chnat Home, Police, Education, DCA tangwa wym yoo won iwon iwon i kylla wa wanrah u hapoh ka Constituency,” ong u Holando Lamin.
Neiliang u R.L. Tariang hawa pynsñiaw yei daw wa psiah u cha ka Party NPP, ong haroh u wa hadooh katni ym pu yoo ki kawon kawon ka kaam wa u Lahkmen leh u hapoh ka Constituency, deiwa pynbaad wa toh u bru wa heh i kular khlem yurim.
Da pynrap u wa ya ki kaam yong oo da yoo lyngba i beiñ i pynbaad waphær wa awjan man-ka-sngi.
Hawa kyruiñ won u cha u Stephanson Mukhim uwa oo hi da e u yei kyrchaan wa pura, da ong u wa uni toh u bru u wow kreh yei kaam wei u wow khana leh cha ki paidbah yei yi wa oo leh u.
U Wailadmiki Shylla hawa khana parom hajrong ka Party NPP da kdaw haroh u ya ki kaam wa ka sorkar MDA da leh ko ha ka jylla hapoh i yahkhmat ka NPP, iwa wot ka sorkar wada lai chadien ym jooh nood ko u tba wa kynthup yei kaam kajia pood, ka Them Metor najrong kiwi won ki aiñ wa ka da wanrah ko neibynta i myntoi i roi i paar u paaid ka jylla.
Hawa paan kyrchan won u na ki paidbah, ong u wa u Stephanson Mukhim wot hadien wa chah rem u ha u snem 2018 leh wym em jngai u na ki paidbah, tangwa pteiñ u yei kaam yarap katkam wa chah i bor u, ini pynyoo ko wa toh u bru wa em sakhiat i mynsien chakri paidbah la jop næ rem.
Kam u kyrtong NPP na ka Amlarem Constituency, u Stephanson Mukhim ong u wa ha u snem 2013 wa jop MLA u kam u kyrtong samen katwa ye da pyrchang u wanrah yei roi i paar, kamtæ khut u i yakrehlang kiwa boon khnang yow poi cha ka thong i jop wei daw ye u lehbha chooh chooh ya ka thaaiñ.
“Da yoo wa i ksoh u Lahkmen ya ki kyrdan waphær ha ka jylla la kam wa chim kabu pathan ya ki paidbah, neitæ ki Scheme wa toh u yoh yarap ki paidbah leh suki heh u khlem leh iyi iyi, najrong boon i rukom krehkaam yong oo i wym yahaap wa u paidbah,” da ong u Stephanson.
Kiwi won wa e yei klam kynthup ya u Otomewot Lamin, u Saron Paswet wa kiwi haka yalang wa pynlai da u Het Pohthmi, Block President Amlarem.
