Ka dorbar mang tangka yong ka Jaiñtia Hills Autonomous District Council (JHADC) ynne ka sngi da mynjur ko ya ka mang tangka wa duna T. 30,60,14,100 neiwa ye u pynmih neibynta u snem 2023-24 ya kawa da wanrah hapoh ka yung dorbar ynnin ka 9 tarik da u Thombor Shiwat CEM ka Council uwa pait leh ya ka chnat muna tangka ka Council.
Katkam ka mang tangka yong u snem 2023-24 da mang wa ka JHADC daw yoh dan (Estimate Receipts) ko kamwa T. 172,59,38,400 wei daw pynlut (Estimate Expenditure) won T. 205,19,52,500 iwa mut wa duna hadooh T. 30,60,14,100 na iwa ye u pynmih.
Hawa yatoh wa boon palat i pynlut, u CEM da ong u toh neidaw wa pynku tulop ya kiwa kreh man-u-snem kamjooh kiwa da chong ngiah wa i pynkrehkaam yaka JHADC Members Pension Act 2019 wa kiwi de.
Heijooh i por da kdaw u leh ya ki laad kiwa ye u yarap pynku ya ka yarong poisa ka Council wa kynthup yei pynku ya ka dan ka chnat ka Taxation khamtam na ki mar pohkhyndaw (Major & Minor Minerals) wa na ki kari, i pyndooh noh ya ka chnat Fishery wa Agriculture heiwa kiwa kreh kini ki chnat waroh u em noh ki hapoh ka chnat Market.
Neitæ ka JHADC da mynjur ko leh wow pynkylla pynjanai ya ka aiñ JHADC (Trading by Non-Tribal First Amendment) Rules, 2023 wa da wanrah da u Executive Member wa pait ya kani ka chnat u Winning G. Sungoh.
Neilliang u Winning da ong u wa ini toh i sien wa nyngkong wa da pynbha lane pynkylla ya kani ka aiñ, wei lyngba kani da yoo wa em leh boon ki laad ki luti wow pynku ya ka yarong poisa hapoh kani ka chnat krehkaam.
Chwa ini da em leh i ya chimbynta da ki kattu katni ngut ki dkhot wow ya phyllu yumut hajrong kani ka mang tangka kamjooh leh hajrong ka aiñ JHADC (Trading by Non-Tribal First Amendment) Rules, 2023, wa da chimbynta da u Brightstar Chyrmang, u Holando Lamin, u J. Treilang Suchiang, u Phasmon Dkhar, u Aiborlang Shadap wa kiwi de.
Kini kiwa da ya chimbynta da kyntu ki ya ka Executive Committee yong ka Council wow krehchitom bha neibynta i bha yong ka Council khnang wa kiwa kreh kamjooh wa ki kam ki MDC leh ym maad ki yei eh.
Katwa u Brightstar won da kyrpaad u ya ka Executive Committee wow paitbniah bha yei liat rood ka poisa yong ka Council ha waroh ki bynta wa ka Council jooh pynmih ko ya ka yarong poisa khnang wow ye u pynduna yei sepai ka poisa.
