Jowai: Ka yung dorbar chna aiñ yong ka Jaiñtia Hills Autonomous District Council ynne ka sngi haka dorbar tlang da pdiang ko yaka kur Papang waka kur Mynso kam ki kur kiwa ye u yoh bynta yaleh yaka kyrdan Dolloi hapoh ka Elaka Shangpung.
I pdiang ka yung dorbar ya kani ka kur toh hadien wa ka Executive Committee da dep bichaar bniah ko yei yachim bynta ki jait kur wa yakhun Dolloi ha katai ka Elaka ha u snem 1964 wei ha itai i por dang tip yaka JHADC kam ka United Khasi and Jaiñtia Hills Autonomous District Council.
Ya kani ka kur da pdiang hapoh ka aiñ jied Waheh chnong jied Dolloi yong ka Council ya kawa da tip kam ka The Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) (First Amendment), Act 2020.
Da pynpsiah leh ya kini ki kur haka Number wa 16 yong ka Appendix-11 ka aiñ, hei bynta wa kdaw yaki jait kur wa yoh u yachim bynta. Kitæ toh hadien ka jait kur Rabon-Shylla da pynmih sa ka Number wa 6 deiwa pynpsiah yaka kur Papang waka Number wa 7 deiwa pynpsiah yaka kur Mynso, iwa mut hadooh kattæ em 7 tylli ki jait kur wa ye u yakhun yaka kyrdan Dolloi haka Elaka Shangpung.
Chwa ini da em leh ka kynta wow booh yaki phang kylli daki MDC ka liang pyrchah wa kynthup ya u Andrew Shullai, MDC Congress, Dawan Lyngdoh, MDC BJP, Lakhon Biam, MDC BJP, Krison Langstang, MDC BJP wei neiliang ki EM wa toh u pait yaki chnat krehkaam waphær waphær wa kynthup leh ya u CEM da e ki yei jubab.
